晏畫喺屋企煮飯時發現，廚房窗台有隻四腳仔。又唔郁又唔盛。

　　因為對四腳仔嘅接受能力較高，而且佢好細隻，個樣冇乜威脅性，所以只係一路煮飯一路望住佢，驚佢睇唔開跳入煲嘢度，一拍兩散。

　　如果係曱甴，就絕對唔會再行入廚房零點一步。

　　菜生部相機真係幾好，zoom到咁近影都算清。本來想post大圖，但自己都有啲頂唔順，所以都係細圖算。

　　但頭先放大嚟睇，先發覺佢好似瓜咗 =_=b 唔怪得幾個鐘都唔見佢郁。

　　當然係等菜生返嚟善後啦。

　　因為就搬屋，地方大啲，想領養小狗，先發覺其實都幾多可愛狗比人遺棄。

　　松鼠狗又有，北京狗又有，約瑟爹利又有，史納莎又有，金毛尋回又有，唔明啲人點掉得落手。

　　最近發現八哥都有。八哥好似都名名地種喎下話？我諗好快連貴婦狗都會有。

　　最慘我覺得係雪撬狗……喺香港生活已經係好好好好好勉強，仲要被人遺棄。

　　你話人有乜資格去享受自然資源丫？人其實真係地球上嘅大害蟲。

　　最後俾大家睇一個七隻小狗被遺棄嘅故事……祝願新嘅一年果個主人得到佢應有嘅報應。

　　七隻無辜的狗狗

　　本來想寫讀後感，但要QUOTE番書中句子又要揭番本書，懶，都係寫電視好過。

　　尋日高清TVB又播包青天，係新版，好似話係ｏ七年拍嘅。最近好多勾起青少年回憶嘅嘢播番，包青天啦，娛樂金魚眼（多謝甘比）啦，好開心，人都後生十幾年。希望遲啲會播番多啲舊卡通啦，想睇《美少女戰士》呀。

　　包青天夜晚六點播完，做完十一點新聞又重播一次。我發覺自己真係可以一日內睇足兩次的，超級FANS。雖然話包青天把聲唔同咗，但講真我都唔多記得把聲。反而佢瘦咗少少令我有啲CONCERN。另外高清之下見到晒佢地啲頭套膠水，同埋見到包大人堂眉非常假，齋畫冇毛。

　　記得初初做包青天時應該讀緊中二，因為當時同班上一個女同學都極鍾意展昭，會交流下啲YES CARD。後來個女同學讀完中二就去咗美國讀書，所以特別深刻。猶記得當年為咗展昭，我ＸＸＸＸＸＸ（為保護尊嚴而消音），幾年後長大成人，又ＹＹＹＹＹＹ（為保護婚姻而消音），而家睇返都唔多明有乜好鍾意。

　　可能人年紀大咗，對男人要求都唔同咗。想當年好鍾意展昭，成日想睇佢溝女（但失望而回），而家反而想睇公孫先生的浪漫史，應該都係冇乜機會。

　　暫時對套劇最不滿係翻炒舊故事，從而家頭一兩集睇嚟，第一個故事係想講「狸貓換太子」。然後睇角色表又有陳世美，作死咩，又做。雖然我真係幾鍾意睇怒鍘陳世美，但真係要搵個好似劉雪華咁似秦香蓮嘅先好。

　　第二不滿係搵唐文龍做白玉堂，成個喬峰咁，好似啲外族咁，唔鍾意。人地明明斯斯文文好有氣質架嘛。記得以前係孫興做架，我又係佢超忠實FANS嚟架。

　　冇第三不滿，幾好睇其實，值得有包青天情意結嘅人追看（雖然可能唔值得一日睇兩次……我諗我以後會分配好少少啲時間，六點半睇娛樂金魚眼，十一點九睇包青天）。

　　睇完包青天又想講下其他嘢。因為頭先上新聞組見人講起日劇《流星之絆》（改編自東野圭吾原著小說），我先驚覺香港啲電視劇好似好少改編啲新小說，嚟嚟去去都係改編金庸，年年都實有一部，連古龍、梁羽生都極少，愛情小說就得Ｄ四五六七葉草，唔明點解。真係有少少唔想再睇改編金庸嘅電視劇，雖然我極好武俠片。

　　我發覺自己寫嘢越嚟越似菜生……我會當自己為方言文學出一分力咁囉，幾百年後可能會有人引用我個blog研究二ＯＯＯ年代香港人嘅語言習慣。唯一係希望謹守唔打錯字嘅防線囉。果啲粵語本字你就咪同我計啦。