| W.W.'s profileWW @ 30sPhotosBlogLists |  Tools  Help |
|
|
11/13/2009 菜狗ON9系列今日，一起身，屋企有被搜掠痕跡。
同上次麵包同糖糖事件一樣，行多幾步又有發現。
連環殺手每次喺同一個地方犯案。
受害者傷勢嚴重，個身穿晒。
睇真啲受害者張車頭相。
菜狗親身演繹何謂「ON9無極限」，handcream都食，話佢唔係傻都冇人信。 今次事件足以證明bath and body works產品香味幾可亂真（我要收埋支朱古力味body cream先得），但食味方面有待加強，因為佢應該係咬穿左之後LAM左一下就冇再食。因為支野冇乜少到。 而家啲cream可以喺啲牙窿度直接擠出黎，好方便，蓋都唔使開。但係支野出面有菜狗啲臭口水味，世事冇完美。 10/4/2009 我老公被人領養緊希望各位有心人可以去救下我老公啦！
 我的名稱叫Ah Choi. 我係出生於11/11/2002. 我係雄性黑褐色的臘腸犬 (已絕育). 而我係在11/9/2009被主人遺棄而被愛護動物協會拯救. 而現時我暫住在香港總部, 我等緊您們來探我嫁.
9/8/2009 菜狗食糖今朝一出房門，見到地下有堆野，好似塵咁，即刻打個冷震：「哇咁大舊塵！」點知執起，咦玻璃紙黎嘅？邊度黎架？ 未行出廳就見到菜狗攤咗喺地，滿心歡喜咁。見佢心情咁靚我都開心啲。不過點解咁好死唔訓梳化呢？ 睇下地下，咦有半粒糖黐住嘅？心裏暗暗有點不祥預感。 望下梳化，哇咁多玻璃紙嘅！仲見到前幾日買果筒Airwave糖嘅包裝紙！ 呢個世界仲有邊個會一次過食晒成筒糖（十粒）咁癲先得架！只得菜狗！ 於是打電話比菜生，問佢筒糖喺邊，佢話放左喺梳化頂 =_=b 於是我話比佢聽，菜狗食晒筒糖喎。 即刻上網睇下會點啦。講到好嚴重，會肚痾，會痾血，會腸炎，好擔心。但係睇佢個樣又冇乜嘢喎，幾精神咁。 咁唯有睇定啲先啦。與此同時問下ｓｐｃａ嘅寄宿服務有冇位，係冇嘅，唔知邊間狗酒店好呢？ hea下hea下又上堂，來回兩三個鐘去上一個鐘古琴，又睇下我捱到幾耐 XD 兩點三出門口，返到黎五點幾，一返到黎，即刻見到地下成灘嘢……菜狗肚痾。 即刻打比菜生啦，同佢講要同菜狗睇醫生。為免移動證物，所以我當然冇執啦 XD 打去NPV問，冇位，但係個recept都好好人，叫我要盡快帶佢睇獸醫，因為驚佢糖分過高。咁我於是唯有諗下睇邊間好啦，想睇下太平道，但又遠又剩，諗起美孚都有間獸醫喎，於是打去預約。 約左即晚七點。菜狗依然精神。我叫菜生放工即刻飛的返黎，所以佢好快就返到。一返到黎菜生處理咗啲證物之後，就帶菜狗落去。我就去提款先，跟住先join番。 都等左成半個鐘先到佢。佢鬼死咁active，個助手仲話佢肌肉好發達，問我地佢係咪成日做運動添。都話佢係全屋至fit嘅生物黎架啦。為咗比醫生睇下佢食左乜，我頭先拎完錢特登去買多筒airwave糖。佢睇完問我係咪gum，咁我話係hard candy，佢望兩望就話都應該冇乜嘢嘅，會自己recovery。全程我同菜生都用好有限同好港式嘅英文（例：He ate the whole pack of candy this morning. Then in the afternoon, he 肚痾）同個獸醫對答，同時見證香港同美國教育的失敗。 診療期間獸醫同佢肛探，佢個樣好搞笑，我同菜生都不禁笑左出黎。期間個助手仲喺佢啲嘴毛度掹左一小舊糖出黎，比醫生笑佢食得唔乾淨。 另外威水史就係個獸醫話佢應該連個package都食埋啦，我就話唔係喎，佢拆出黎食喎（仲要係逐粒拆玻璃紙），大家都不禁驚歎佢夠晒醒。 最後獸醫話佢應該冇乜嘢，比左兩包葡萄糖佢開水飲（唔肯飲），比咗啲止痾藥佢（唔肯食，菜生好辛苦先餵到，不過好似射晒落佢個下巴度），同埋比左三罐處方糧佢，聽日同佢少食多餐。喺呢啲時候我就好感恩我係work from home，唔係都唔知叫邊個餵佢食七八次糧。 今次我表現得好平靜，菜生以為我實會鬧爆佢，點知冇。我都唔知點解，可能學咗古琴又上咗主日學，真係陶冶咗少少性情。 希望傻仔快啲好番，唔好惡化啦。 8/24/2009 慘狗狗哇，乜得呢隻狗個樣慘到咁架……真係睇到都想喊……
編號:218505 種類:狗 品種:八哥 年齡:5 歲 性別:雄性 http://www.spca.org.hk/chi/adopt/homing_detail.asp?number=218505 快啲搵主好人家啦傻狗仔，唔好喊喇。 五歲都應該有機搵到嘅，六歲都幾危，好多人都唔會要LU，慘。 不過啲人話八哥可愛，我真係不敢苟同，慘過乜呀八哥個樣，放工返黎見到唔會心理壓力大啲咩？ 不過呢隻傻狗仔個樣咁慘，希望快Ｄ有好人家要左佢啦…… 而家好多哈士奇（雪撬狗）呀，夏天攬住嫌熱掛，係囉，冬天又養過囉笨，鬼唔望咬瓜晒果啲掉狗嘅人。 8/18/2009 菜狗又剪毛唔知點解成晚上唔到微軟網站加MSN，聽聞話係ＩＳＰ問題喎，唔該搵人同我問下ＢＩＬＬ叔叔（而家灰姑娘成日掛住湊仔唔得閒幫我問）或者梁洛施老公唔該晒。 終於等到上到，即刻SEND左聽日要交嘅JOB比人先啦梗係，然後先睇BLOG。 跟住為大家介紹番而家全屋最瘦嘅動物先。成日以為佢肥左，其實係啲毛多左，一剪左又瘦晒。所以我過幾日都會去剪頭髮。 剪毛小知識：剪完要狂讚佢可愛、得意、靚仔，唔係佢會唔開心。 今日剪完毛佢好似都有啲唔開心，冇好似平時出完街咁笑笑口，我攬下佢佢又胡我。 呢隻倒及仔真係麻煩。
8/10/2009 生無可戀 星期六晚一個唔覺意踩到菜狗隻腳，菜狗即時呱呱叫同向我狂吠同胡胡，好痛咁。
跟住佢就嬲左我，平時我一叫佢就會埋黎，果晚成晚都唔理我，唔過黎我度。想同佢梳下毛佢都唔睬我，匿喺梳化底唔肯出黎。
我又驚佢隻腳比我踩斷，好擔心。
搞到我生無可戀，喊咁滯。有少少明白果Ｄ比人飛嘅失戀少男少女想死嘅心情。
第二朝，一早我就起身返工。平時有人出門口佢實會行埋鐵閘度望實，一見閂左ＬＩＦＴ門就會汪一聲或嗚一聲送別。尋日朝早佢遠距離喺梳化下面望下我就算，超冷淡。
好在放工返到屋企佢都有迎接我，大約有平時八成功力啦。跟住喺房叫佢佢都會入黎，好在，應該冇事。
多謝菜狗大狗有大量呀，我以後唔敢喇T_T 8/8/2009 菜狗與我們。Choi 9 and Us 講下菜狗，費事成日懷緬舊Ｃ，成個阿婆咁。
最近菜狗轉左三文魚糧，哇個口腥腥地，有啲後悔，食多幾包再轉。
而家Ｄ人興食homemade或者barf，barf我真係唔多敢比佢食，而家有時想買生骨比佢潔齒都唔知比佢喺邊度食好（第時如果有過千呎花園就可以比佢喺花園咬），唔通食生骨都比佢上梳化咩，仲要得嘅張梳化？homemade都可以考慮下。不過啲份量好難預，又驚唔均衡，又驚食到佢變肥仔。
菜狗最近越來越忠心咁，不過係對我咋喎。前幾日菜生返工前俯身錫下我，菜狗都即刻跳上床係咁吠佢，正，我鍾意，最鍾意啲咁強悍嘅男仔。不過佢最後當然比人趕返落床啦。
而家屋企嘅等級就係：我－＞菜狗－＞菜生，我好滿意。
不過菜生成日同菜狗玩，所以菜狗都鍾意佢嘅。例如而家菜生開夜未返，菜狗成晚都喺廳等佢返黎。平時我地三個一齊喺房訓架，我地訓床佢訓地下個迷彩兜，同埋會開條門罅比佢自出自入（哇個「罅」字咁難寫我都記得點寫，好勁呀）。最近因為我晚晚天光先訓咁滯，所以完全掌握到佢夜晚嘅行蹤。基本上我地入晒房後佢就會出一出廳all new（以前佢會等我地熄晒燈先all添，不過而家熄燈時間越黎越夜，佢先冇咁執著），然後又返入黎，之後基本上成晚都會喺房訓。係久唔久每晚兩三次出去巡視下咁，如果知我未訓就會埋黎望一望我比我摸下咁。有時佢都會出去梳化攤抖下，如果呢個時候有人去all yeah new，返房嘅時候實會見到菜狗雞咁腳跟埋入房，唔知做左咩虧心事咁。
但係今晚佢真係冇呀，截至現時為止都冇返過入房訓。頭先十二點零我都叫過佢入黎，佢入黎食左我比佢嘅零食之後又即刻出番去。啱啱四點幾佢又入黎fing身，fing完望下我，見我冇乜嘢佢又出左去等佢嘅手下返黎。
雖然佢平時係同我地訓，但如果我地太嘈佢就會出廳訓架喇。另外最近唔知點解佢鍾意左訓梳化底，可能陰涼掛，不過我覺得最有可能係避開我嘅眼目自己匿埋lam毛，死仔包。
菜生最近教左佢訓低，大家喺YOUTUBE都睇過佢嘅精湛演出。不過菜生搞錯左少少野，教佢兩腳企高時用左「起身」呢個指令，須知道呢個指令本身已經ASSIGN左比四隻腳企定呢個動作，所以搞到我同菜狗都好混亂。而家唯有用STAND黎代表四腳企定。同埋有時菜生又會搞錯晒HAND HAND（比右手）同手手（比左手），好jar。
而家菜狗啲毛長番晒，又要剪喇。我好鍾意佢短毛，望落FIT啲。 6/12/2009 菜狗Gor傳奇：馬騮綁架事件話說，菜狗有一個Friend，叫馬騮。
雖然菜狗與馬騮很少見面，但每次菜狗都非常熱情對待馬騮。而馬騮因為承受不了菜狗的熱情，而全身傷痕纍纍，幾乎頭都斷埋。最後經外科女聖手治療，才告逐漸康復。
好景不常，正當菜狗以為終於可以再跟康復了的馬騮闖蕩江湖之際，馬騮竟然被一女魔頭（由外科女聖手分飾）捉去！ 菜狗認出此女魔頭之前也曾殘酷對待過馬騮，將馬騮的尾巴剪去。有圖為證： 這次再次見到馬騮被女魔頭抓走，菜狗自然激動莫名。當他追至湖邊，赫然看到女魔頭正把馬騮浸在湖水裏！ 而且還一邊大呼「好臭－－」。 但由於那個湖地勢太高，菜頭處於低谷之中，無法營救，只能眼睜睜地看著馬騮受折磨。沒料到的是，女魔頭大肆折磨了馬騮一番後，竟然還不放騮，而且將他掛在懸崖上，聲稱要將他風乾！
好殘忍的女魔頭啊！ 菜狗一心想要拯救馬騮，奈何懸崖太高，雖然菜狗一身好輕功，於梳化跳上跳落簡直是小菜一碟，但要跳上萬丈懸崖又談何容易呢？ 所以他只好徹夜在懸崖前徘徊，希望女魔頭良心發現，放下馬騮，但始終失望而回。 馬騮，我一定會為你復仇！化悲憤為力量的菜狗，內心已經播下仇恨的種子。 第二天一早，菜狗掩飾自己內心的憤恨，如常跟男魔頭一起散步，一起all new，有說有笑，好不融洽。 到了差不多中午，女魔頭才施施然起床。女魔頭果然是女魔頭！懶都懶過人！ 女魔頭一打開門，菜狗便按照計劃，猛撲過去－－並非要以武力擊倒女魔頭，而是要假裝投誠，再伺機報復。 果然，既懶且鈍的女魔頭深深被菜狗熱情的假動作所欺騙，以為菜狗已經忘記先前的不快，誠心投靠。然而，女魔頭對菜狗突如其來的熱情舉動也不無懷疑，於是用「他心通version 8.5」向正在為全港終極大魔王工作的男魔頭說出了此事，換來男魔頭一句： 「kui tang wa mic duck lor」 聽到男魔頭的一句話，女魔頭就放下了戒心。她把菜狗留在身邊，然後在自己的床上開工，為擴展邪惡勢力籌集資金。 菜狗一邊按捺住想咬啖女魔頭的衝動，一邊在等候機會…… 機會終於到了！女魔頭要到廚房覓食。她看到菜狗在床邊的地上睡得很熟，便沒有打擾他，跨過菜狗，離開了房門。 就在此時，菜狗運用他那驚天地泣鬼神勁過光速蒙面俠的輕功，馬上跳上床all new，然後又馬上跳回地上繼續假裝閉目養神。
女魔頭回來了！菜狗內心十分緊張，雖然他仍然躺在地上，但已準備好當女魔頭向他反擊時，馬上跳起逃走。 可是，這個女魔頭是多麼的既懶且鈍啊！她一心只想盡快籌集足夠的資金擴展邪惡勢力，完全沒有發現床上的異樣，還一屁股坐了下去。 雖然女魔頭是如此的既懶且鈍，但她畢竟還是覺得有點奇怪。她發覺自己的大腿有點濕濕的，一摸下去，大腿冰冰涼涼的，是怎麼回事呢？ 「一定是剛才洗手的時候沒有抹乾，手濕濕的就到處擦吧！」女魔頭又用她一貫對待世事那種「同情地了解」的態度去猜測道。 於是她動也不動，一直坐在濕濕的床單上。此時菜狗十分後悔，要是剛才all的是一泡毒new，那該多好啊！這樣遲鈍的女魔頭坐上去後，就會皮開肉爛了。 十多分鐘後，女魔頭再次起來出去。那種奇怪的感覺揮之不去，怎麼衣服都好像有點濕濕的呢？她慣性地拿起衣服用鼻子一聞－－咦？正當她又慣性地想用舌頭舔舔的時候－－ 她終於看到床上的水漬了！就在她「呀」地驚呼時，復仇計劃大成功的菜狗已經逃去無蹤了。
－完－ 5/8/2009 菜包
一時偷懶，晏少少起身啫，菜狗竟然同我食晒成包麵包。我起身果時剩係見到地下有個吉袋，即刻打電話問菜生有冇食過包麵包（其實就算有都唔會一次過食晒六塊……），冇，真兇呼之欲出啦。 包麵包放嚮摺枱，又未開過，佢竟然連個膠袋都識mit開，仲要mit得鬼咁靚，然後食到渣到冇得剩。但係梳化到仲有幾粒麵包碎……竟然仲識跳上梳化食咁鬼嘆。 事發後仲要久不久返去疑似案發地點懷緬一番：
其實包麵包都放左嚮度幾日，就過期，啱啱諗住今日食，尋晚仲成晚喺度諗點食好，點知今日就冇咗，世事真係無常。 菜狗今日成日都有少少食滯feel，唔多願郁，希望佢大步檻過啦。 4/30/2009 我和尋回犬的十個約定 冇睇呀，真係好驚睇到狂喊，上次睇電視播套《老友狗狗》都喊到傻（雖然有幾段好無聊）。睇住果十個約定先啦：
一．請耐心聆聽我的話語。 四．別忘記我也有感情的。 五．不要和我打架，因為終有一天我長大了，我便會贏的。 六．我不聽話的時候，一定是有原因的。 七．你上學，有朋友，但是我……就只有你。 八．我老了以後亦請繼續做我的朋友。 十．我不會忘記一起渡過的日子，我死的時候，請留在我的身邊。 第七至十點真都睇到好心up，啲人成日話好想做狗呀狗好舒服咁，其實我覺得狗生活喺人類社會同坐監冇乜分別。完全冇自由做想做嘅野，就算係做啲自己本性嘅野（例如大小便），都要莫名奇妙比人鬧。十幾年嘅生命完全喺人地嘅掌控入面。唔知會唔會有朝一日呢個世界冇晒所謂「寵物」，大家都可以各自喺自己嘅圈子自由自在生活？ 4/29/2009 Down 今天我跟菜生努力教菜狗down。
因為星期天在課堂上老是無法引他做到伏下的動作，所以昨天開始決定改用在網上看到的clicker training + capturing方法。最初要等很久才捕捉到伏下的動作，後來他知道每次伏下來都有吃的，就越做越密。結果令人滿意，今天已經可以加cue，讓他聽到down就伏下來了。不過因為才剛開始學，當然不是次次都能立即做到。明天繼續努力吧！
因為是第一次摸索著用這方法，所以還有很多做錯了的地方（例如沒有click卻給零食，還有每次都在相同位置練習），希望能慢慢改善。
用這個方法最好的是菜狗自己也很愛玩。今天他明顯比較開心（當然中午有靚女來探望過他也是原因之一），整天都蹦蹦跳的，而且時不時走到訓練的位置等上課，勁搞笑。 4/27/2009 Dog Training #1今日上第一堂，菜狗係超齡學生（另外兩隻都唔夠一歲，菜狗簡直係大叔）兼超級惡霸（嚇到隻長毛芝娃娃震晒）。Miss話佢係aggressive果隻吠唔係想同狗玩果隻吠，可能想做alpha dog，又話佢以後都未必同到狗玩，但起碼要教佢唔好咁惡囉。聽到我都有啲心UP。識唔到狗朋友唯有介紹多啲人朋友比佢識下啦，仲好啦人識買玩具比佢。 一路上堂佢就一路比人係咁隔籬（因為一吠狗就要即刻隔離），人地兩隻狗狗開開心心放繩玩，佢就喺隔籬間唔知咩房慘吠，慘到爆呀～～吠到失聲咁滯，好心你啦，唉。 另外唔知點解真係做極都做唔到ｄｏｗｎ呢個動作……差啲想親自示範比佢睇。 落堂搭的士，個的士佬話剩係去香港喎，咁都唔係拒載？難得菜生同個的士佬同聲同氣話係呀果邊去香港喎。乜的士有分香港的士同九龍的士架咩？我下次叫ＶＡＮ喇，人地貨ＶＡＮ仲大啲添，舒服啲又平啲（我CHECK過美孚去旺角一程四十三咋喎，頭先旺角搭返美孚成舊水咁滯），你地繼續短加長減兜路拒載啦下。 4/24/2009 菜狗與KONG幾天前家裏來了一隻自來雀。
隱約記得自來鳥不是什麼好兆頭，而且怕禽流感，所以牠後來飛走了，也好。 今天上班前又到LOG ON逛了一會，其實每次都只是看那少少幾個櫃的狗用品，但還是每星期都去看。這次買了狗餅。 因為大小比較適中，剛好可以卡在Kong的洞口，晚上下班回家就給菜狗試玩。
果然玩得不亦樂乎。可能因為第一次這樣玩（平日都只放一些很小塊的狗餅進去，一下子就給滾出來），所以對牠來說也算是個大挑戰吧！ Dog Training的筆記上說小狗因為天性是獵食者，所以會喜歡花一點工夫才得到食物。如果是人的話應該大多都喜歡飯來張口吧。真是人不如狗了。 4/15/2009 罪證菜狗經常瞓上菜生果邊床的罪證。
4/6/2009 菜狗沖涼 |
|
|
