唔知點解前排開始IE啲圖示亂Q晒，例如上圖，拿姐個blog變左做TVB個logo，但其他人嘅blog又正常架喎。唔知係咪知拿姐鍾意睇TVB。

又例如上面果列，SPCA圖示其實係公共圖書館；最尾果個facebook其實係google。「我的最愛」入面啲圖示當然更亂，好礙眼。

連Bill Gates都唔鍾意我。

　　唔知幾時同菜生傾開旅行，講起啲人好鍾意影啲Cutie相，用手撐住比薩斜塔呀，用手指吊住座樓呀，之類呢。

　　都係果句喇，你鍾意影唔緊要，你影得開心就好啦，但係人地唔影唔好話人乜乜七七囉。我都未歧視你你走黎話我。

　　記得舊年去埃及就係咁，個領隊其實幾好人嘅，好鍾意搵Ｄ Cutie景點同人影Cutie相，咩用手指拎住個金字塔尖呀，哄埋去比獅身人面隊錫一啖呀果啲呢。咁有時佢見我唔影就會問我影唔影，我話唔影佢竟然話我「去旅行應該開放啲」。

　　拿拿拿，之所以時下年輕人咁多吸毒咪因為咁囉。我唔鍾意吸毒架，但係去clubbing梗要開放D架啦。

　　係咪我唔鍾意做果樣野，同其他人一齊做左，我就係「開放啲」？假設係，我要咁開放黎做乜？

　　好多年前去絲路又係咁。有一餐食駱駝「肉」喎，其實係食駝峰入面果啲脂肪。哇你就咁聽都唔想食啦下話，其實係一堆脂肪黎咋喎。咁我本身極憎食肥膏，所以咪唔食囉，又比同枱團友話「去旅行應該試下新嘢」。呢個世界咁多新嘢，點解我明知唔鍾意都要試先，即係你明知跳樓會死你又試下跳？真係唔明囉。

　　仲有就係食全羊宴果陣同個燒羊頭合照，哇食人族咩大佬。君子遠庖廚呀。

　　其實我真心覺得影Cutie相、食駝峰脂肪、影羊頭冇問題，係我自己唔鍾意啫。咁你鍾意你咪做，我唔鍾意咪唔做囉，何必將自己一套強加我身上，或者覺得你果套先係好正常好外向好活潑，我唔鍾意我就好封閉好老套好拘謹呢？一個人係咪乜都要鍾意（或表現得好鍾意）先得人歡心架？咁做人法真係連狗都不如。

　　不過我咁講完菜生又會話我何必在意他人目光架喇。冇呀，我見你facebook提起我先講下咋。

　　而家做人真係好煩，以前讀書中學畢業都算好勁（我阿媽曾幾何時都拎住佢張會考證書向我炫耀），而家一個招牌跌落黎都責死十幾廿個master。

　　最唔明係，明明做生意嘅嘢多競爭應該會平啲架，但係而家啲碩士course（唔係講MPhil，講修課式碩士only，MPhil係另一個世界黎我覺得）完全超越通賬地越黎越貴。我前幾年讀都係四萬幾，而家連啲極純文科都起碼六萬幾（我覺得應該係因為好多教師會去讀，故此其實係掠教師水），讀完在工作上會有少少用嘅就坐底八萬，至於一啲擺到明係掠教師或商家佬水嘅就更誇，例如乜乜對外漢語教學果啲，前幾年已經學費十幾萬，ＭＢＡ就更唔使講啦。真係去外國讀冇咁嬲。

　　之前讀翻譯Postgraduate Cert，個老師叫我地讀完不如報ＭＡ好過繼續讀Postgraduate Dip，因為其實係讀一樣嘅嘢。本身呢兩年都有諗過讀，但係讀一讀又成十萬咁滯，阻住我儲錢買車買樓養菜狗，讀完又唔見得回到本，所以都係算鬼數。有興趣嘅繼續報埋個Postgraduate Dip好過，萬六蚊，仲有持續進修基金claim，實收六千。

　　最弔詭係好多時讀書係為升職，但工作最緊要其實係工作經驗，學歷根本其次再其次。而且分分鐘你掛住讀書，返工都要偷偷地做功課，放工又雞咁腳上堂Ｏ唔到Ｔ，影響工作表現。

　　呢個世界越黎越多我唔明嘅嘢，唔知係我蠢咗定係點。

　　人黎到呢個年紀自不然開始有啲十九幾年冇見嘅朋友請你去飲。因為我個人本身衰所以呢類朋友都唔多，託賴。

　　講真大家都喺香港，見個面又有何難。一唔係ＭＳＮ、ＥＭＡＩＬ都可以溝通，如果真係朋友就唔會話不聞不問咁長時間。所以基本上一啲平時冇ＭＳＮ開又一年以上冇見而又明明喺香港近在咫尺嘅人，我都唔會再當係朋友。ＭＳＮ都會ＤＥＬＥＴＥ埋。

　　有啲人覺得多個「朋友」對自己事業呀乜乜物物會有幫助，我又唔係好覺。直至現時為止我做過最好做嘅工都係自己搵嘅，朋友反而會壓下價。同埋靠關係搵ＪＯＢ又好搵工又好，到頭來都會好煩，要同好多人交代咁。

　　睇《標竿人生》最大得著就係再一次提醒自己，你的時間在哪裏，你的心也在哪裏，就係咁簡單。You can pretend to care but you can't pretend to be there.前排興啲咩quality time，話爸爸每日陪仔女十五分鐘就ＯＫ喇，乜乜物物。係囉，你咪試下陪佢十五分鐘，果十五分鐘你陪到佢曉飛都好，都唔會比得上日日陪佢半日嘅豬朋狗友，即使果啲豬朋狗友只係陪佢ＨＥＡ。

　　主要想講Stephy本書多錯字嘅問題。

　　我覺得完全係編輯同出版社責任囉唔該。個責編完全係炒得。你話一本書有三幾個錯字唔奇，但頁頁有錯字真係好離譜。絕對有理由相信係冇審過稿，遑論一審二審三審終審校對清樣。

　　講真明星出書你都唔會旨意佢寫得好有文采字字鏗鏘啦，而且呢個世界乜都講分工，作者嘅責任就係寫，作者寫完仲要佢對埋呢啲係人情唔係道理，做編輯就係要負責後期工作架啦，個作者寫到句句冇錯字，通順到無比，仲使你？所以Stephy呢次比人圍插真係好無辜，雖然我都想買你本書撐你，但又唔想啲出版社以為咁樣本書可以賣好啲，所以都係算。

　　做作者需要嘅係諗頭、創意；做編輯需要嘅係細心、紮實嘅中文根底。小學生有諗頭嘅一樣可以出書，個個作者Ｄ中文好到無倫乜都唔使改，呢個係編輯嘅夢想但係係世界嘅悲哀。

　　我覺得倪匡講得最啱：「咁呢個係編輯同校對嘅責任。其實小說有錯字唔係咁重要，錯字多唔代表小說唔好睇。我覺得而家啲廣告、電視同報紙成日玩食字反而教壞小朋友。」（from appledaily）而家啲人成日理埋晒啲細眉細眼嘢，為左睇人ＰＫ就捉人啲少少錯處無限放大，呢啲風氣仲衰過書展賣靚模寫真啦。

　　咁跟住講靚模寫真。

　　我又唔明有乜問題。咁人地果啲唔係書呀？書展剩係可以賣有字書呀？又要人地獨立整個寫真展乜乜物物，呢啲咪小圈子所為囉。

　　話寫真教壞細路，呢啲真係虛偽到無比。睇寫真覺得壞嘅根本就係「風沒有動旗沒有動只是你的心在動」，人地食雪糕刷牙都話人意識不良，呢啲咪叫心邪囉。講真從食雪糕刷牙相裏面睇到當中寓意果啲人，都已經不再純潔啦，又何來教壞。

　　我成日都覺得，嘢係死嘅，人係生嘅。你比張刷牙相個幼稚園老師，佢係醒嘅就會識得用張相教啲細路日日刷牙：「拿你如果好似呢個姐姐咁日日刷牙，就會變到佢咁靚架喇。」而唔係乜都唔比啲細路睇囉。要知道你越唔比睇啲人係越想睇，好似本身我對寫真冇乜興趣，而家搞到我都想買番本，直頭覺得係文化icon咁滯。

　　最後講下出書問題。

　　久唔久都有人叫我出書，可能以為讀中文嘅人會好鍾意出書，但係其實唔係。首先我讀中文除左一科「寫作訓練」係必修之外冇讀過任何創作課程，可見我其實對創作興趣不算太大。二來其實越係讀中文，對出書應該會越係小心，又唔會想寫啲太通俗嘅書（所以而家諗番以前有中學中文miss話自己想寫啲張小嫻咁嘅書，我都覺得奇怪，不過佢讀KongU嘅好以，同中大嘅文化又有啲唔同），唔想出啲渣書出黎有辱師門。三黎對我黎講出書有三大作用：賺錢、等多啲人睇到、表達自己思想。咁賺錢黎講除非好出名，唔係都好難賺下；多啲人睇呢樣我覺得post上網仲實際，同埋我寫嘢純粹真係想寫完全唔mind有冇人睇，冇人睇仲好可以粗口連篇；表達自己思想黎計我暫時又冇乜偉大思想想同全人類分享，所以真係冇乜出書嘅理由。

　　不過而家出書咁方便，自資出書又越來越平，第時可能會出都唔定嘅，出黎當portfolio都好。以前我都幾抗拒自資出書，覺得好似求職騙案咁，我明明想寫書賺錢你要我比錢先？不過而家有時見啲朋友自資出本書又幾靚，同埋又可以全權話事咁滯，好過要遷就出版社方針，其實都幾好。所以唔好等我出喇，大家自己出本罷啦。一於咁多個blog友一人一書啦，我殿後。

　　真係久唔久要鬧狗香港個人先可以保持清醒，唔係遲早被同化變埋喪屍。

　　因為啱啱做緊啲嘢要搵啲關於幼稚院畢業禮嘅資料，點知唔搵由自可，一搵把幾火，見啲家長喺度講話個仔畢業禮要比成五百幾蚊服裝費，比佢上台表演乜乜物物，又要比錢去「謝師宴」。啲家長自己都話啲衫著得一次好嘥，又話嫌貴，然後佢個仔讀果班一年轉左三次老師，去到謝師宴都唔知謝邊個，但「幼稚園畢業一世人得一次咪比囉」，一係又「個個比唔通我唔比」，真係睇到我鬼咁嬲。呢Ｄ行為真係助長晒Ｄ　ＰＫ幼稚園斂財，又向下一代灌輸唔環保同過度物質化嘅信息，真係唔知想點。

　　而家啲人好興乜都話要「紀念」，幼稚園畢業又咩一生人一次（老老實實有咩唔係一生人一次先得架），又話要買番隻畢業禮ＤＶＤ，講真你一世人流流長你邊紀念得咁多野呀大佬，你買野買多少少都要掉咁啲吉番啲位出黎買新嘢啦，我又信你隻幼稚園畢業ＤＶＤ可以Keep一世到你退休好得閒果陣拎番出黎回味呀。真係一來使埋晒啲無謂錢二來製造垃圾，整多個宇宙比你都唔夠做堆填區啦。

　　講真我又要調查下到底呢個世界有幾多人仲記得自己幼稚園畢業禮係點，我自己真係完全唔記得囉。幼稚園生涯我剩係記得我暗戀過一個姓孫嘅男同學同埋有次派茶點果陣賴過一次尿但係扮倒瀉水掩飾過去同埋被臨時拉伕跳過一次《晴天雨天孩子天》舞跳得好樣衰（呢個仲好有可能係發夢）之外乜都唔記得。我覺得一個人如果仲清楚記得自己幼稚園畢業禮其實都幾可悲，因為佢一定係人生裏面冇乜嘢值得去記，分分鐘幼稚園畢業禮喺話劇度扮棵樹已經係人生巔峰，所以先會牛高馬大仲記得。當然如果佢係天才乜Ｑ都記得就當別論啦。

　　上yahoo知識搵仲好笑，有個人問人有冇幼稚園畢業演講辭，仲要英文，呢啲真係虛偽嘅極致，唔只個學生要搵老豆老母請槍，就連老豆老母都要搵人請槍，仲有冇搞笑啲呀。

　　我真係好憎呢啲虛偽嘢儀式嘢，亦唔覺得有咩紀念價值。莫講話幼稚園畢業禮，小學畢業中學畢業我都有去畢業禮，但係我真係一次都唔記得，係記得有次應該係中學要上台拎獎學金，企喺台下等果陣挨埋牆比個應該係ＭＩＳＳ話狗我企得衰之外，真係乜都唔記得。所以我三次大學畢業禮（BA、Cert Edu、MA）都冇去過，免得嘥時間。

　　（反而如果講我求學生涯最記得嘅一次集會，就真係八九年啱啱發生完六四，小學搞嘅集會，果陣大家仲要整啲黑紗上身，以示莊重，又唱晒民運歌呀咁。即使自己當時未必明發生乜事，但係因為感覺到啲老師嘅情緒，所以記憶好深刻。）

　　其實以我養狗嘅表現黎睇，我都應該係個幾理智嘅家長，因為咁耐我都冇話買好多貴玩具比菜狗，買得最貴又最失敗都係果隻咁嘅爛溶溶馬騮，就算零食都係比喺寵物展拎嘅狗糧sample算，又健康又唔使錢。所以我應該都可以堅持到唔比錢做埋啲無謂嘢，火起果陣仲分分鐘去d7個幼稚園校長。不過人嘅嘢好難講，細路咁易受朋輩影響，如果知我唔比錢佢喺畢業禮上台跳現代舞，可能比人笑呀，比老師輕視呀，乜乜物物咁，話唔埋會嬲我一世。不過而家冇仔我就可以好瀟灑咁講，我又唔mind喎，父母子女嘅嘢生出黎就係互嬲一世架啦，佢幼稚園果陣唔嬲你你慌佢步入青春期之後唔會嬲你呀。不過第時有仔又唔知點啦，所以我都係唔會born a son架喇，get more dogs and cats算啦。

　　我係特首我就比梅窩啲居民揀喇，拿拿拿，你要學校丫嘛，一係起間玫瑰崗喺你隔籬，一係起間正生，你地揀囉。

　　拿拿拿，我唔係歧視玫瑰崗，用緊借代法咋。玫瑰崗事件只係冰山一角，而家香港青少年吸毒問題係嚴重到我食完lunch冇野做，咪索Ｋ囉，直接跳過食煙，由食飯一躍而去到索Ｋ。再係咁落去，可能過多幾十年索Ｋ會等於食煙咁普遍，而食煙就等於食飯咁直頭係必須。到時可能啲人係會爭論酒吧應唔應該全面禁Ｋ，可能又會有Ｄ人出黎爭取話我索Ｋ又影響唔到人，仲好過食煙啦，點解唔比索，之類。

　　返返去梅窩。我向來對任何人或事都同情地理解，永遠嘗試站喺你嘅立場睇問題。我真係明白點解啲家長咁擔心，佢地其實係將正生等同美沙酮中心所咁滯。咁美沙酮中心又係幾得人驚喎。

　　但係唔係丫嘛。正生唔係美沙酮中心丫嘛。見到有個師奶話「正生啲學生放學後可以返屋企，去佢地父母身邊；我啲仔女放學後要山長水遠搭船先返到嚟」，我真係聽到火都黎。喂你連正生係寄宿學校都唔知，你學咩人抗議呢真係。啲學生入到正生唔係咁易出番黎囉唔該－－「除 了 紅 、 白 二 事 ， 學 生 在 三 十 個 月 內 不 能 離 開 荒 島 」。其實我唔介意你抗議，但你抗議得黎都聽下人講野先啦，喂搵人將之前壹周訪問正生校長果篇野讀出黎喺梅窩廣播啦，我諗果度啲人而家都唔得閒自己睇架喇。

　　對唔住但係我真係覺得梅窩抗議果啲人係好自私囉，好似香港變成點唔關佢地事，梅窩（表面）純如蒸餾水就ＯＫ咁。咁不如獨立左梅窩出去啦，大家都開心。睇番梅窩啲人嘅訴求，其中有一點話爭取政府起間國際學校比佢地喎。係囉，都話起間玫瑰崗過你地架啦。

(星島)2009年6月6日 星期六 06:30
(綜合報道)
(星島日報 報道)梁洛施 為李澤楷 未婚產子，於加拿大 多倫多時間4月26日誕下麟兒，由爺爺李家誠 親自為孫兒命名李長治，亦由父親李澤楷改了英文名Ethan，兩位玄學家均指BB是富貴命，一生衣食無憂，與母親較為親近。
　　據玄學家麥玲玲 為李長治批命，BB一生有很多長輩及貴人扶持，衣食無憂，將於7歲起運，讀書運強，但個性未必喜愛做生意，反而喜歡做研究工作。Ethan命格旺母親多點，更會有很多女性長輩緣。麥玲玲又指梁洛施有男性貴人緣，留在外地較為合適，男友或丈夫年紀較大較合適，將一生有男性貴人扶持，身邊的男人都是非富則貴，但結婚與否都不會讓人知道。
　　另一位玄學家高萌禧亦表示，Ethan性格硬頸固執，父母緣分很重，但其命格亦顯示父親身邊不乏異性緣，BB亦會有很多其他兄弟姊妹，但與父母親感情仍很深厚，改名長治配合其命格將會財源滾滾。文：娛樂組

麥大師都真係未免太準喇喎……直頭新聞報道咁。而家Ｄ人測命真係好似報紙寫星座運程咁，咩「冬天屬羊嘅人會較易氣管有毛病，化解方法係著多件衫」呢類「預測」經常出現。娛樂性十分豐富。