| W.W.'s profileWW @ 30sPhotosBlogLists |  Tools  Help |
|
|
10/18/2009 @NJ總結加照片
新屋
食物 龍蝦屋
行街
教會
中央公園 物質 @NJ-8 又係時候離開米國喇。
星期五一早，老爺奶奶就出咗去開工。我都好早醒，不過都係等老爺奶奶出去後先起身。同菜生一齊，繼續食粥，食埋前幾日同奶奶慶祝生日嘅蛋糕，我仲食左最後一雪糕，解決咗早餐。
十點幾老爺奶奶就返到屋企，大家HEA咗一陣，影左幾張全家福，就出發去機場。菜生渣車，沿途都冇乜特別，好順利。
去到機場，第一次CHECK IN唔使排隊，以為好少人好順暢啦，檢查行李果陣先大鑊，打幾層蛇餅。跟住比個唔知海關定乜老點去咗另一邊，話果邊好少人，點知一樣打蛇餅。有個黑妹喺度埋怨話本來喺另一邊已經差唔多到佢，點知比職員老點咗黎呢邊，仲要排耐咗。排到差唔多到我地喇，另一條隊個櫃台嘅職員竟然叫佢果條隊啲人龍走去我地個櫃台搞手續，痴痴地線。我後面幾個年輕洋妞即刻投訴，話佢做乜叫啲人排我地果邊，又催前面條懵炳move move move（因為佢由得隔離條隊啲人插過黎，又唔出聲又唔搶先走上櫃台，戇居居咁），最後都總算順利過關。雖然有少少波折，不過今次唔使比人大搜身，都算好好好好。
過完關時間尚早，就去咗食嘢。我叫咗意大利粉，雖然喺美國食意大利嘢都係傻傻地，但都及不上菜生最後一餐都要食中菜，啲西蘭花仲要黃嘅。差唔多時間登機，我地就去登機閘口啦，等咗一陣就登機喇，咁聽到空姐叫我地個行數就走埋去排隊啦，點知條隊唔郁喎，一大咋俄羅斯佬喺前面，狀似排隊但又紋風不動咁。咁我地見勢色唔對，於是就走上前啦，點知班友根本唔係我地班機嘅，唔知塞住我地個登機閘口把托。
上左機，今次有人坐我地隔籬喇。而且後面仲坐咗一家三口，一個洋妞阿媽帶住個八九歲靚仔同一兩歲靚妹，原本佢地唔係坐我地後面，但個阿媽話想照顧自己啲仔女，就同人調咗位，全家坐晒喺我地後面。本身以為洋人細路女見識廣啲，冇咁易喊，點知呢個靚妹真係改變晒我對洋細路嘅印象，全程十六個鐘，起碼有十個鐘喺度大喊或者大叫。不過我最近脾氣好咗，又冇乜感覺，因為坐成十五個幾鐘機，講真我自己都想大喊同大叫啦！要怪只怪個老母做乜鬼帶個咁細嘅靚妹坐長途機，希望各位已為人母或快將為人母嘅朋友引以為戒，去長途旅行果陣交個Ｂ去ＢＢ酒店或者ＳＰＣＢ暫託一陣最好。
另外仲有一個問題，咁大陸航空啲機呢，個個椅背都有個電視仔，其實係幾好，但係因為個電視係觸控式螢幕嘅，但個螢幕又幾遲鈍下，咁有啲人（例如我身後的細路，同埋我去美國果程後面個女人）就會超級大力咁篤落去，甚至不耐煩地每秒狂按幾十下，真係背脊都比佢篤穿。遇到呢啲情形我會好大力咁向後挨一下，以示不滿，都幾有效。
十五個零鐘返到香港，當然比美國濕夾熱啦。聽到機長報告話氣溫三十度，真係嚇鬼死，不過出到去又冇想像中咁熱，路上仲有啲風添。搭車返屋企時我眼瞓到爆，本來想返到屋企即時訓覺，但結果都係打咗陣機，睇埋魯魯修同鋼煉，寫埋ＢＬＯＧ先瞓。
至此成個０９ＮＪ之旅又圓滿結束。 10/16/2009 @NJ-7 終於黎到旅程最後一天，今日了埋啲未了心願。
今日都好晏起身，九點幾，等老爺奶奶出咗門就到我地，先去Costco，買咗啲調味料同即食意大利飯。然後去Target，買咗兩本書，仲有一支芥辣。跟住行咗陣（一兩分鐘）GAP，冇嘢睇。行完就會合老爺奶奶去DINER食飯，食咗牛扒。
食完飯去附近間BATH AND BODY WORK睇HANDCREAM，鬼咁貴，冇買，買咗啲嘢送比奶奶，自己又買咗幾舊香薰蠟燭，自用。因為買夠唔知幾多錢，送件嘢，揀咗青瓜味HAND CREAM。買完嘢返歸，休息，我打咗陣機。老爺奶奶冇幾耐返黎，比咗好多LOTION我，慳番唔使買。跟住佢地睇碟，菜生玩電腦我睇書。睇完碟奶奶煮飯，好好餸。食飯前老爺拎返啲陳年舊相比我地睇，睇到大頭怪菜，仲有各人嘅後生相。食完飯菜生將呢幾日影嘅相過落老爺部電腦度，又睇咗陣相。而家我好眼瞓，應該就瞓。
今日好大雨，落足成日，好在都係喺屋企附近玩，冇乜影響。當然唔落就更好啦。 10/15/2009 @NJ-6 今日其實係@DC先啱，因為今日去華盛頓。
菜生成日以為我想去，但係其實我係一年前想去，當時佢一手粉碎咗我嘅願望，今日想再補償已經太遲。不過我都姑且應酬下佢去一次，當去多個地方囉。
雖然今日要山長水遠去華府，但今朝亦都係咁多日黎最晏起身嘅一日，成九點幾先起身，搞呢搞路食粥化個粧又成十點半，跟住先出門。
去華府要成三個鐘車，中途去咗個休息站（唔記得係咪波爾的摩）休息下，食下嘢咁。因為太回味喺龍蝦屋飲果碗蟹湯，所以喺休息站都飲咗碗。雖然冇龍蝦屋咁好飲但係都唔錯，值得一讚。
去到華府已經成點幾兩點鐘，搵咗個剩係准泊到四點嘅街位，就先行去印第安人博物館食嘢。老爺奶奶推介話果度啲嘢食係印第安土著嘅食物，又平又好食咁話，於是去試下。啲嘢食係幾特別，不過又唔覺好平，我同菜生兩個都食咗成三百幾銀港紙，food court黎咋喎。食完嘢去咗博物館底層嘅gift shop睇下，啲鍊貴到傻。
食完午餐已經好晏下，得番半個鐘行太空博物館，結果剩係喺底層影下啲太空船，同埋行下gift shop就算，最後喺gift shop買咗兩本書，同埋拎咗大量應該係免費嘅介紹紙仔，幾得意，介紹返啲同件貨相關嘅知識咁，好鬼知性。我最鍾意拎呢啲免費嘅傻嘢，雖然唔知會唔會睇。
夠鐘去拎車，點知見到附近有啲位可以泊到六點半，於是轉移陣地，但係菜生又唔夠硬幣，我又覺得冇乜嘢好行，所以都係泊多半個鐘算。泊好車又返去印第安人博物館睇，今次由四樓巡到落樓下，其實我就覺得個館麻麻地，如果講印第安人生活，可以好似香港個文化博物館咁重現返佢地嘅實際生活環境，我諗會有趣啲。去到二樓又行Gift shop，呢間啲嘢平Ｄ喎，不過冇買，又係拎咗大量應該免費嘅介紹紙仔。行行下發現夠鐘，拿拿臨又去拎車。拎左車喺附近兜咗個圈，又返歸。
華府啲博物館最好嘅係唔收錢，好鬼正，希望香港果啲都效法下啦。可惜今次時間唔夠，而且又落雨，下次希望可以喺度住返一兩晚，慢慢行下，話晒首都嘛。
返歸途中菜生話部車要休息下，於是去咗個Perryville Outlet行。一去到我已經有啲不安，哇好鬼恐怖呢個outlet，人影稀疏到近乎冇，啲霓虹燈壞咗一半咁，又大半舖頭熄晒燈（有啲閂咗舖有啲執咗），好鬼得人驚啲氣氛。跟住菜生去咗佢最鍾意嘅Nike Outlet行，又比佢揀到對佢恨咗好耐又唔捨得買嘅波鞋，原價千幾銀港紙而家減到二百幾蚊，我都買左對鮮黃色波鞋。買完嘢，想話去廁所，但結果我驚得滯，都係決定唔去，猛咁催菜生走。喺個Outlet附近見到啲Motel，氣氛陰森，哇即時諗起德州電鋸殺人狂之類，真係好恐怖。
離開恐怖Outlet之後返屋企，食飯。今晚有大量長蟹腳（諗諗下菜生好似冇影相），我因為唔識剝食得較慢，老爺奶奶手勢則異常純熟。食完飯一齊睇《天水圍的日與夜》，老爺同菜生都覺得麻麻，我就好鍾意（但冇表露出黎），覺得佢啲細節好有心思又好值得人深思，戲冇明顯高潮但其實所有掙扎都喺人物內心，各自都有說不出的壓抑但生活照樣地過。同埋我好鍾意呢種成個故事冇奸角，唯一奸角就係命運嘅安排。最後講到大舅父靜靜向安仔提出可以供佢去外國讀書呢幕我都幾感動。始終要戰勝殘酷命運靠嘅都係人與人之間嘅情誼。對上一次令我有呢種感覺嘅戲（其實係電視劇）係木村同常盤貴子套《美麗人生》，最後葬禮一幕完全冇任何呼天搶地，連天氣都係極好，男主角形容女主角嘅骨灰好似沙灘嘅沙一樣細白。無論命運如何殘酷只要人照樣過活，不必做英雄打救全世界，其實就已經足以顯出人嘅堅強。 10/14/2009 @NJ-5 其實今日係@NY先啱，去咗紐約。
八點零起身，老爺之前一晚煲咗粥，今朝我又坐享其成。食完嘢拿拿臨就出發，交通暢順，約個零鐘車程就到紐約。去到搵停車場泊好車，然後搭地鐵先去中央公園。
去到中央公園，先食嘢，然後就去我最鍾意嘅動物園。中央公園個動物園其實幾細下，動物又唔係話好多，分熱帶雨林館、極地館、爬蟲館，仲有中間個海獅池。雖然地方唔大動物唔多，不過啲動物都幾活躍下。熱帶雨林館啲雀係咁飛，同埋人同雀嘅距離好好好近，一抬頭就會見到頭上樹枝有隻大雀，有時啲雀仲會跳去人附近。唔知咩館啲蝙蝠又係活潑，一大咋成幾十隻蝙蝠係咁狂飛，場面震撼。海獅池有兩隻海獅，一隻好懶咁喺石度曬太陽，另一隻就圍住個池猛咁游，表演咁。最最最得意係極地館啲企鵝，有啲喺岸上係咁拍翼，有啲就喺水度狂游，有時仲會跳上水面，姿勢優美。同埋呢個館有度好就係人同動物嘅距離好近，睇得好清楚。不過有度唔好就係啲館好臭，尤其爬蟲館臭到不堪，企鵝館又有好大陣腥味，都幾難忍受。
行完動物園出中央公園逛下。因為有好多馬車喺中央公園外圍行黎行去，所以周圍都有陣好強勁嘅馬屎味。所以如果要總結今日中央公園之行嘅感受，就只能用一個「臭」字概括。
離開中央公園就搭番地鐵去百老匯。因為應承咗個同事幫佢買啲Ｍ＆Ｍ精品，於是就去咗Ｍ＆Ｍ專門店。啲嘢好得意，但又幾鬼貴，不過有成三層，又好鬼好睇。除左紅色同黃色果兩隻Ｍ＆Ｍ公仔外，而家好興綠色果隻女仔公仔，自由神像都搵佢黎扮。不過我又唔多鍾意果隻野，可能同性相拒掛。
行完Ｍ＆Ｍ過咗隔離Hershey專門店，真係Hershey都開專門店使唔使呀。而且佢都學Ｍ＆Ｍ咁整左隻公仔喎，就係呢，大家都知Hershey果隻花塔餅形朱古力係點架啦，就喺佢上面加啲眼耳口鼻，搞掂。真係唔知搵邊個黎買。
行完又去搭地鐵，今次去蘇豪。不過因為時間關係，行得一間潮服店，跟住又行返去唐人街，買Ｄ電影電視影碟比老爺奶奶，然後就返歸。
返到屋企八點零，大家未肚餓住，於是一齊睇碟，睇咗《Laughing Gor之變節》，唔好睇。睇完同老爺奶奶一齊食飯，奶奶仲煲咗鮑魚雞湯，我又繼續坐享其成，係幫手拎下湯呀，裝下飯咁。食完飯好眼瞓，一陣打完BLOG我就瞓覺。 @NJ-4 講番星期一，哥倫布日，有啲人放假，有啲人又冇得放，好慘。
一早起身，搞呢搞路，唔知搞過乜，食過早餐，老爺奶奶出咗去，我就同菜生去搵放假的cream。
菜生先去Junction買橙，冇。於是去Cream記樓下，接Cream，去philly行咗一個鐘街，又拎咗報紙同買咗蛋糕預祝奶奶生日。然後去Weber食快餐，一人一個芝士漢堡，加一個薯條，各自一杯嘢飲。我飲咗朱古力奶昔，其實完全係雪糕黎，冇乜可能用飲管飲到，其實好早我就懷疑係咪唔應該用飲管飲，但又唔好意思出聲。呢間係Drive in嘢，所以要喺架車入面食，個盤掛咗喺隻窗度咁，險象環生。
食完嘢，去間寵物用品店睇下啲狗嘢。見到啲狗沖涼驚到震晒，又慘又得意。啲嘢貴貴地，冇乜嘢啱買，買咗一舊玩具比菜狗做手信。
跟住上Cream屋企，去下廁所，睇下結婚相簿，都唔錯幾好睇。啲房好大，廁所又大，間屋真係好好好大。坐咗一陣冇乜嘢做，我地於是返屋企。臨走確認佢冇賣到部ＷＩＩ，安心少少。
返到屋企，菜生訓覺，我費時打斷啲作息節奏，冇瞓，睇下第二日去紐約啲資料。時間過得好快，又夠鐘去搵cream食晚餐。於是又開車去佢屋企樓下，接佢同板去佢屋企對面食意大利嘢。
本來想食意大利飯，冇，於是食意大利麵。但係大家食包飲湯食頭盤（釀磨菇）都飽晒，啲巨型麵食黎咗之後每人食得十零條又飽晒，唯有包起拎返屋企。
食完飯去行商場，其間我想去廁所，於是跟商場啲指示牌行，點知原來個廁所好鬼遠，行到我身水身汗，點知返去搵菜生佢地時，先見到原來有另一個廁所喺好近，ＤＫＬＭ。之後菜生話Cream嫂問我係咪悶，唔係，不過我唔鍾意講嘢啫。如果我悶我就會覺得好嬲，會拍晒枱走，到時大家都一定唔會悶。
同場加映番我嘅表情解讀，方便番大家。其實我通常都冇乜開心唔開心，悶唔悶，好心如止水下。但係如果嬲就會好嬲囉，方圓廿里以內嘅人都一定會知。
食完飯返歸，老爺奶奶食緊飯，因為大家都好飽所以食唔到蛋糕，沖個涼搞呢搞路然後又訓覺。 10/12/2009 @NJ-3 雖然只係第三日，但係好似黎咗好耐咁，唔知點解。
今朝大約六點起身，呢幾日啲作息時間幾好，早睡早起，返香港都保持到就好。起身食嘢，食咗龍蝦沙律、壽司，仲有必不可少嘅每日一雪糕。食完hea陣，老爺奶奶起身又煲咗粥同整咗糉，仲有油炸鬼，又食一餐。跟住沖涼。
食完去outlet，去JERSEY SHORE OUTLET，本身想買份生日禮物比奶奶，但冇野啱，我又唔想買嘢，冇錢，所以hea行，行左冇幾耐就嗌肚餓，去咗food court食薯條熱狗。今日好多人，呢度尤其多唐人，倍感親切。食完嘢老爺奶奶過到黎，佢地已經買咗嘢，於是一齊走。
返到屋企休息一陣，就返教會。老爺奶奶仲入咗詩班，熱心教會事務，所以要早啲返去練詩。我同菜生喺教會外面遊蕩咗一陣，因為秋天開始有啲落葉，啲鋪頭又好多閂咗門，所以望落感覺蕭瑟。見到有間雪糕店，喺戶外擺啲桌椅，直頭成個荒蕪花園咁。行咗一陣又夠鐘，返教會崇拜。
教會得好好好好少人，但個教堂又好大，對比強烈。唱台灣讚美之泉歌，好聽。中間突然有兒童時間，叫班細路出黎唔知做乜。啲細路好似好唔願意咁，同埋佢地同個外籍主日學老師全程英文對答，唔識國語，令人唏噓。跟住講道，講得極深入，講晒聖經歷史咁，香港唔會有，有都冇人會返。不過我呢個香港人當然覺悶，頻頻睇錶。結果成個崇拜超時完成。
崇拜完有愛筵，有野食。啲嘢幾好食，大家又傾下偈咁，都幾好。
食完都八點，又返歸。雖然今朝沖咗涼，但因為唔想第二朝先沖，所以又沖，乾淨過平時。跟住老公執佢自己啲嘢，我打機，又一天。 10/11/2009 @NJ-2 今朝五點零起身，菜生同我一齊起，食左尋晚老爺奶奶買番黎嘅壽司同三文魚刺身做早餐，然後hea左幾個鐘。等老爺奶奶出門後，我地菜生就行左去附近嘅百視達睇下有冇戲好睇，然後又去shoprite行。喺果度都見到一啲想買嘅嘢，最後買左一盒雪糕筒同一本雜誌，冒雨返歸。
返黎就煮lunch，等老爺奶奶返黎食。咁我剩係負責蒸水蛋，菜生負責煮菜、煲飯同蒸魚，但最後條魚都係等奶奶返黎先蒸。食完飯又要即刻出發，去Cape May間Lobster House再食過。
今日龍蝦屋唔係好多人，所以幾舒服。我地先食左生蠔同生蜆，食左蟹湯，好味。跟住仲每人食左半隻大龍蝦，其實食到呢度大家都頗飽，但老爺又去買左個boiled seafood combo之類，又帶子又魚又釀青口又crabcake又蝦，仲有多個薯仔，飽到傻。臨走意猶未盡佢又買左龍蝦沙律同龍蝦湯返歸。
個零鐘頭車程後又返到屋企。眼訓，寫Blog，洗面，瞓。 @NJ-1 10月8日晨早十點幾機，七點零出門，因為菜狗暫託咗喺SPCA，所以冇狗送出門。帶左頗少行李，個喼裝得一半都冇，應該好輕。
喺機場大家樂食咗個早餐，去免稅店買咗嘢，喺登機閘口等咗冇耐就上機，時間剛剛好。
上到機，座位附近有好多騎呢人。首先係有對五六十歲夫婦唔知有心定無意坐錯位（原本坐中間坐錯喺窗口），跟住果兩個位嘅主人叫佢地坐番自己位，果對夫婦竟提出要同佢地換位，人地當然唔肯。跟住喺旅程當中就發覺果對夫婦應該唔係幾識英文，但係又多多要求，一陣又話唔要預訂果個餐，一陣又嫌個麵包硬咁，屬比較麻煩的一類。
跟住我地個位隔一條巷嘅右邊，就坐咗個艷女，應該二十頭，著黑色背心黑色熱褲，化晒裝，一上到機就不停講電話，講到本身坐佢隔籬嘅一對男女都買佢怕，自動調咗位。講到機長叫人熄電話佢都唔捨得熄，差啲勞動到菜生向空服員投訴。全程機大部分時間佢都好嘆咁瞓晒喺成排位度，空姐叫佢綁安全帶都好少理，有時難得坐起身，又棟高晒隻大脾咁，春色無邊。好在菜生坐喺我嘅另一邊，見唔到呢番景象。見佢咁豪邁嘅性格仲以為佢係bamboo rise，空姐都以為係，問佢係咪公民，佢又話係遊客，可能係加拿大bamboo。落機前三個半鐘佢就已經喺度補妝，所以話真係呢個世界勤力的女人最美麗。
另外一個發現係美國啲空姐真係特別惡死。第一宗惡死事件就係斟水事件。話說我同菜生坐飛機中間果排椅，咁菜生坐左邊，我坐中間，右邊個位冇人。咁派嘢飲果時，右邊嘅空姐（約五十幾，香港人黎）比完嘢飲我，就順手問埋菜生要乜。咁菜生拎咗嘢飲，左邊架車仔先到，個空姐（肥，三十尾四十頭，台灣人）問菜生要乜，菜生話有，個空姐就不斷「質問」（無誇張）菜生杯嘢喺邊度黎，菜生話係右邊個空姐比佢，跟住佢竟然「教訓」（無誇張）菜生話下次應該等佢比，真係痴鬼線，一來係香港空姐主動問菜生要乜，二來要杯水都唔得，集中營咩。
第二宗惡死事件同之前講過果對略帶麻煩嘅夫婦有關。咁對夫婦本身係預訂咗啲特別餐（應該係低糖餐），咁可能搭長途機太辛苦，後期佢就要求空姐（台灣果個）取消之後果幾餐，咁個台灣空姐都ＯＫ咗。但到派餐果陣，個香港空姐又照派嘢比佢地食，咁佢地就話話左唔要喇乜乜乜咁，個空姐就好似阿媽咁話佢地：「我地公司幫你訂咗個餐，你地而家話唔要，好嘥錢架喎！要啦！」於是對夫婦就好可憐咁勉強食左個餐。
今次程飛機全程十五個鐘多啲，我今次帶咗好多大學校友會同埋宣明會呀、失明人協進會果Ｄ免費會刊上機睇，幾好喎又，呢啲平時成日寄黎都冇時間睇，咁樣一次過睇完掉喺飛機度就得，都唔錯，ＯＫ好睇。最好睇嘅環節竟然係中大校刊入面講校友動向果部分，又有潘蔚林（就係話佢報道颱風消息受觀眾歡迎），又有王晶，呢啲名人固然好睇，但有啲奇怪消息都好搞笑，例如有個新畢業嘅ＢＢＡ學生，話佢因為金融海嘯搵極都搵唔到工，後來終於搵到份郊野公園顧客服務員咁，真係唔知登出黎做乜。然後又有人寫左首詩勉勵香港人喺金融海嘯中逆境自強，同埋有大量某某校友出新書嘅「消息」，我諗呢個環節應該都係Ｄ人自己寄上去登，好過賣廣告。
呢程飛機頭六個鐘都ＯＫ，之後大半時間都幾難捱下。不過今次冇睇幾多戲，係睇左一套講動物嘅短片，睇左Matrix1（唔錯）、2（唔掂），仲有四眼雞丁（Chicken Little，條魚好笑）。其實都幾多新戲，我地啱啱喺戲院睇完嘅Star Trek都有，又有二十世紀少年二，不過我都冇乜點睇，一黎啲英文新戲冇中文字幕，二黎啲續集電影，我根本冇睇過第一集，所以唯有睇番啲舊野，例如Matrix123都有齊字幕，我又冇睇過，正晒。
好辛苦捱完十幾個鐘機，去到機場過關好鬼多人，啲關員手腳又慢，所以搞咗極耐。之前提到果對老夫婦今次又發揮香港人逆境自強同積極進取嘅精神，佢地本來排喺我地左邊果一行，我地右邊個counter本來係冇關員嘅，但後來黎咗一個關員，喺右邊個counter搞黎搞去咁，好似想開工，個老婆就一馬當先即刻排定喺果度先，個老公都好似有少少尷尬咁叫佢返黎先啦，都未開始，乜乜乜，但個老婆借咗聾耳陳隻耳，好堅毅咁繼續等，雖然都等左一段時間，但都終於比佢等到，仲早過我地過關添，頂。
然後到我地過關喇，咁都好順利，反而我地左邊個counter就搞左好耐。事緣果陣係一對台灣父女喺度過緊關，咁個黑人關員猛問佢地台灣係咪即係中國，咁個老豆就話唔係呀，係台灣呀，中國係中華人民共和國呀咁，咁個關員又答話係囉，台灣係中國一個省（state）丫嘛，跟住個台灣老豆就笑住話not yet，如是者相同內容嘅對話重複咗幾次，個關員依然係搞唔清楚。連幫我地搞緊果個關員聽到都皺晒眉咁搖搖頭，搖左好幾次，笑死。
過完關，順利拎咗行李，一出到去就見到老爺奶奶。老公渣車，返屋企後都四五點，老爺奶奶又要去開工，我沖完個涼訓覺，訓到第二朝五點先起身。 5/31/2009 30大壽還記得幾年前每逢舊同事謝某生日我都會取笑他：「哇你今年30歲喎！」然後他又會辯解說自己才29，豈料今年輪到自己了，而且已經無從辯解。 因為是30大壽，所以要一連慶祝三天。菜生星期五已請了一天假，又租了車，陪我玩足三日。 星期五 中午菜生取車後，就跟我回娘家收拾了部分書本回美孚。書櫃裏終於有自己的書，不必再把圖書館借來的書當自己的了！
本來打算星期六日也回去收拾，不過最終還是放棄了，三天裏只搬了一次書。 收拾過東西後，晚上到小瀝源吃飯。菜生特意選了一家可以帶狗的餐廳，不過菜狗其實整晚也被綁住，還要受蚊叮之苦，所以接著兩天吃飯都沒帶上他了。
吃過飯後回九龍塘開工。菜生後來來電說菜狗把剛才晚飯的剩菜打翻了，非常浪費。 下班後坐車兜風，然後到西貢滿記吃甜品，並研究開甜品屋的致勝之道。
星期六 早上又開工。下班後跟菜生到九龍灣的大榮華吃茶，還吃到了這幾星期很想吃的豬腳薑～～
下午回家，因為雨太大，所以我在家裏開工，菜生攤抖。晚上到尖東的梨花園吃韓嘢，叫了一個二人餐，最初以為會不夠飽，但後來又吃剩東西了。
吃過晚飯又兜風，兜了到港島，又數碼港又盛，見到海洋公園。一路上黑漆漆的，但還是沒看到星星。 在赤柱的荒山野嶺被一隻超大草蜢上了車窗，牠極其頑強，儘管下著大雨仍從赤柱一直跟我們到了美孚，後來用水撥才搞掂了牠。 星期日 正日！但無可避免仍要開工，很可悲。 因為菜生不喜歡吃巧克力蛋糕，所以打趣說要他買（因為BLOG友飯局時讓他吃了罐頭桃蛋糕），豈料真的買了。很高興。
十一點回教會崇拜。崇拜完後吃足三兩。吃過東西菜生去了看醫生，我繼續開工。 下午要跟菜狗上最後一節的訓練。因為今天菜狗要考試所以我也有點緊張。因為菜生早上不小心餵菜狗吃東西了，所以考試表現不好。不過最後還是拿到證書，而且看到他跟另外兩隻狗狗玩我也很高興。
訓練完了又帶菜狗兜了一會兒風，然後回家。稍息後，放低菜狗，跟菜生到了山頂吃飯。最後千揀萬揀，選了一間叫「Spagetti 360」的餐廳，仔細看了看餐牌，才發現其實是Spagetti House，真是該煨。 不過東西挺好吃的，我喝的那杯柚子冰也很棒，還一次滿足了我想喝飲料和吃雪糕的願望。 吃過東西又兜了一會風，中途遇到中學同學。真是天注定要她祝我生日快樂的，正所謂是福不是禍，是禍躲不過。 如此這般生日又過去了。星期一（25/5）又承蒙新記舊同事請吃飯，很感動。還得感謝ＪＯ生清書櫃賣唔去送給我的一套《東京巴比倫》ＸＤ。吃過客家菜後還到了哈根達斯吃雪糕。不知道是因為一天吃了兩次雪糕（中午吃了麥狗的史力加雪糕）的關係，還是睡眠不足的關係，吃完雪糕後竟然有點暈。不過平安回家，還入了譯稿費的票。錢真的很重要。 另外今天（30/5）又承蒙保珠姐、Kiki和菜生到尖咀陪我唱Ｋ。更特別鳴謝加州紅給了我們一間有獨立廁所和走廊（！）的超級大房：
其實是次唱Ｋ是替六月初生日的Kiki慶祝的，我的生日好話唔好聽都差不多過了頭七，本來也不指望有人請。所以最後保珠姐很豪地請了我們所有人（包括冇事冇幹的菜生），而且還有台灣手信，真令人驚喜萬分。 今年的生日禮物除了譯稿費和《東京巴比倫》外，還有菜生送的銀鏈一條（用來掛6299送的玉墜），以及菜生送的三文治機一部（其實是我要求送的ＸＤ）。 5/18/2009 Blog友生日飯「ＭＳＮ網名前加生日日期宣傳活動」取得大成功！終於催眠到一眾Blog友請我吃生日飯！ＹＥＡＨ！果然只有勤上網的朋友才是好朋友！ 感謝各人的籌備，今年第一場（也可能是最後一場）生日飯局終於在昨晚圓滿結束，地點為好近Christmas屋企（搞手的特別福利？）的圓方Sala Thai。除了沙拉非常辣以外，東西都很好吃。而且雖然我吃得不多，但竟然奇飽，很有「五餅二魚」的效果。 因為有點不好意思的關係，所以沒有拍食物相相，但回家後才想到連大合照也沒拍，實屬遺憾。唯有拍下各人給我的錢錢，聊作記錄： 多謝Christmas、3DDB、Tony、康師傅、青爺、寧兒、Kiki、菜生～～多謝你地請我食飯～～多謝你地送蛋糕比我～～多謝你地陪我傾偈～～多謝你地幫我還晒恒生卡Ｄ cash dollar～～多謝寧兒幫我開齋用張東亞卡～～多謝唔知邊個叫蟹食得菜生鬼咁開心～～多謝Christmas比左半邊桃菜生～～多謝Christmas同KiKi終於拎番屬於佢地嘅嘢～～多謝青爺向菜生傳授剪髮技巧～～多謝Tony幫我影相～～十萬個多謝～～ 邊個跟住生日呀？係時候自我宣傳下喇！ 4/19/2009 肥安君禮謹祝肥安馮伉儷百年好合，永結同心。 先講講本人準備出席婚宴的工夫，仲多過自己結婚。 首先剪髮。應該有超過一年沒上過髮型屋剪髮。已經蓬亂至本人無法接受的地步，本來想去好好恤個靚髮，但最後還是抽不出空（雖然樓下已有成打髮型屋）。勇字當頭而又有勇無謀的我，於是叫菜生幫我剪。結果剪到－－即是人地肯免費兼花咁多時間幫我剪呢，我唔應該咁多怨言嘅實情。留海剪得不錯架其實，不過後面碰巧剪到尷尬位（女孩子一定明白我的意思，那是剛好及肩的長度，每天早上起床會看到一邊或兩邊嚴重翹起，求其如我都無法接受），所以今天花了極多時間整理。最後用了織織送的捲髮器來把翹出去的髮尾捲回來。於是捲髮器就變成直髮器了。 你或許會問：既然沒空去剪髮，那何不用捲髮器把長髮捲成微曲當Set頭呢？Well，我的有勇無謀可不是浪得虛名的。 接著是做Facial。對上一次已經是自己結婚前，即是去年七月了。如果不是要修眉的話也不想去做。結果選了自己樓下平台最近的那一家（從家裏下去半分鐘就到）。本來想做最便宜的那一種再加修眉，但原來最便宜的那種只得針清和面膜（與宣傳品上說的不符），於是就選了次便宜的。雖然因為宣傳品與實際情況不符，第一印象有點不好，但因為做面的那位美容師感覺上挺細心溫柔，而且做面房裏沒有電視或電台，所以也挺滿意。不過最重要的部分修眉就沒大角咀的天使修得那麼好了。雖然過程中一直暗暗提醒自己，近日金融海嘯很多美容院倒閉千萬不要join course，但最後join了，請大家祝福我。 然後是化粧。我這次也照樣使出渾身解數去濃粧艷抹。之前看過那個台灣單眼皮女孩的神奇化粧術後，本來想仿效一下，但一直沒空買雙眼皮膠紙，更遑論好好練習了，所以最後還是用深藍色眼影矇混過去就算了。不過今天化粧掃脫毛脫得厲害，化完了粧後變得像個毛孩似地滿臉毛，單是撿毛也花了很多工夫。不知道哪個牌子的掃會比較好用？ 最後是衣服，這方面我很有先見之明地之前一晚已經準備好了。只是今天心血來潮把短褸換成了披肩，再由於天雨關係把高跟露趾鞋換成高跟短靴。 本來今天下大雨，我跟菜生又捨不得獨留菜狗在家（順帶一提，原來德國有法例規定不能獨留狗狗在家中，如果住在德國就可以免卻很多應酬了），再加上本來答應一起去的蘇記身體抱恙無法出席，我也真有點不想去。不過想到自己花了這麼多工夫（還特地去配了即棄隱形眼鏡，真是自己結婚都冇咁神心。不過話說本人結婚當日戴眼鏡是因為我老公話戴好睇過唔戴喎。仲話本人唔戴眼鏡好似男人，但而家又話化左粧戴con都幾好，真令我想殺人），而且我結婚時肥安也有到賀，所以還是去了。 婚宴地點在沙田馬會，挺隔涉的，不過從美孚乘計程車去因為有尖山隧道的關係十來分鐘就到了。七點半出門，七點三刻就到了，快到無影。八時多場內唯一朋友（其他都去了旅行。說到這裏我還蠻感恩的，因為我結婚當天都幾齊人，我想他到的人基本上都到了）扶老（公）攜幼來到，跟我們坐在同一桌。等到九時多才開席。不過此後過程挺順利的，沒有無聊遊戲，一道菜接著一道菜上桌，大約十一時就吃完了。因為我們這一桌坐不滿（不過以如此惡劣天氣來說，每一桌都坐得算滿了），有些人又早走，所以席中有人把炒飯和甜品之類都打包拿走，拿走時還叫我們不要介意之類。我又懶風趣口沒遮攔地說了句「係囉而家經濟唔好丫嘛」，得到人家馬上澄清是因為明天工人放假才把東西打包。 婚宴中沒有無聊遊戲令我頗為高興。不過沒有騙徒假扮抽獎逐圍收錢令菜生有點失望。中途少不得新郎出來獻唱，而且還播放了新娘偶像林海峰特地為一對新人錄的錄音，是新郎出的主意，挺有心思的。早知道我也叫菜生替我找展昭錄音啦，分分鐘親身黎耍兩劍都仲得。 整體來說該場地普普通通，最大優點是會場周圍都有電視，菜生說那是因為賽馬日那些馬主都坐在這兒邊吃飯邊看賠率喎。 4/12/2009 blog聚bbq特別鳴謝3ddb伉儷籌辦的復活節BBQ BLOG聚，令久未BBQ的我終於可以一償素願。 BLOG聚地點是大埔的大尾篤燒烤王，環境好，抵食夾好味，very good！！！當中最受歡迎的是鱔片～～不過我最喜歡蜜糖烤麵包！！:d 這次聚會除了有第一次見面的3DDB及其好老公外，尚有返咗香港大半年仲好似尋日先返咁的Christmas，以及寧兒和康師傅，還有3ddb老公朋友一位。席間大家都言談甚歡，可惜因為本人夫婦要趕回家餵飼小狗（看到滿桌的大魚大肉就想起小狗餓肚子的慘狀），所以未能與眾人奮戰至最後一刻，希望有機會可以再聚！！！
4/8/2009 御泰X今晚同ＣＥＲＴ ＥＤＵ同學食飯，去ＡＰＭ的御泰Ｘ（唔記得全名）。普普通通啦，個木瓜沙律好辣下，但椰奶湯幾好味。但又魚又蝦咁要剝殼好煩，唔多想食。 過程冇乜點呀，食下傾下咁咋，菜生都去咗，但因為想坐窗口位，搞到坐我對面，傻嘅。 最後提醒一下某人（雖然佢應該唔會睇到）： 你記得還番條毛比我呀！！！！！ 唔係我下星期扣起你啲人情架！！！ 1/28/2009 09Jan@Osaka Day 3-51月26日，到了環球片場。因為一夜無夢，所以雖然要早早起床，但也很精神。 菜生比我還要早起，到了酒店的商務中心用免費WIFI上網。待他回來後我們便出發。 以為平日去人較少，但JR上還是人頭湧湧的。不過在遊樂場買票時倒也沒有排長龍，很順利。
在遊樂場裏玩了蜘蛛俠、回到未來、未來戰士、ET、大白鯊等遊戲，又看了芝麻街的４Ｄ電影。本來想去玩侏羅紀公園，不過因為維修所以關門了。史力加的４Ｄ電影也看不到。 最好玩的還是蜘蛛俠和回到未來。回到未來那車子晃得我有點想吐……芝麻街裏的ＥＬＭＯ真是超可愛……可惜因為它太受歡迎了，所以無法走近跟他合照……很想買大的ＥＬＭＯ公仔，但要五千多ＹＥＮ，菜生不准我買:( 所以最後只買了一堆膠ＦＩＬＥ和碌了很多銀仔，也買了兩包餅當手信～～才五點鐘遊樂場裏的設施便關門了，於是我們便回道頓堀吃晚飯。 菜生先行到道頓堀附近逛時裝店，我回酒店休息。稍事休息過後我們便去吃河豚。本來我們是以餐廳門外的河豚公仔作記認，但去到才發覺那兒有好幾間餐廳都掛了這公仔，有一家還連掛三個=_=b 最後我選了一家看來較平民化的，吃了河豚刺身和每人一個定食。河豚刺身吃起來沒什麼味道……而那個定食則超難吃。=_=b
吃過這家，我們便到另一家再吃，以作補償。菜生點了牛肉火鍋，我則點了河豚火鍋。煮熟的河豚好像比較好吃，湯頭很甜但似乎還是沒有想像中好吃。這間餐廳因為是旅遊書裏介紹的，所以簡直是港人飯堂，還以為自己到了銅鑼灣。 吃過東西繼續逛街，走著走著就走到了難波。不過商店大都關門了，所以我們打算改天再去。回酒店途中在便利店買了牛奶和雪糕～～～～～牛奶超好喝～～～～ －－－－－－－－－－－－－－－－－－－－－－－
一月廿七日，第四天。我十點半才起床，出門時已是十一時多。我們到了酒店樓下的日本餐廳吃傳統的日式早餐，跟那兒的侍應超級言語不通，但那位女侍應極度努力地用英語問東問西的，很友善。吃過東西便坐地鐵到門真南的OUTLET。
在門真南的三井OUTLET逛了三個多小時，那兒的無印良品FACTORY OUTLET很好逛，東西便宜又漂亮，忍不住就買了一大堆。另外也在化粧品店買了一些指甲油和面膜，也買了一塊電子錶。時候差不多了就在OUTLET那間看來像日之出食堂的餐廳吃飯。我們每人點了一個定食。因為氣氛關係我點了炸豬扒飯，又有飯又有烏冬，好吃便宜又大碗。
吃過飯先回酒店把東西放下，再到難波逛難波PARK。在那兒的一家超級市場買了一些杯麵和即食食品。然後再到道頓堀吃飯。
在道頓堀繼續光顧港人飯堂，這次吃的是「蟹道樂」。點了一個蟹餐，有蟹刺身、蒸蟹腳、網燒蟹腳、蟹蒸蛋、蟹面豉湯和綠茶雪糕。菜生燒蟹腳燒得很好吃～不過我還是比較喜歡吃刺身～～
生積的菜生吃了一堆東西還嫌不夠飽，於是我們到酒店放下東西，又到酒店附近一家餐廳繼續吃。我們點了一個刺身拼盤，五件拖羅壽司，還有一個壽司拼盤，所有東西都超級新鮮 >v< －－－－－－－－－－－－－－－－－－－－－－－ 一月廿八日，最後一天！沒有節目！因為機場巴士十點就開了，所以起床後就立即去坐巴士到機場，再在機場逛免稅品店～～午餐在機場吃，套餐裏的那幾塊吞拿魚刺身是瘀紅色的，比百佳賣的還要糟糕。 |
|
|
