各位新婚人士不妨一齊交流下。

　　對我黎講做人妻嘅責任比較係精神上多於實務上。例如多啲同老公傾偈呀，聽下佢講爛ＧＡＧ呀，支持下佢做傻事呀，互相學習互相勉勵呀，拓闊彼此嘅眼光呀，娛樂大家呀，作發洩對象呀，有更多精神（同肉體）交流呀，諸如此類。洗衫煮飯等家務事我睇得好開，有時間就做冇時間就遲Ｄ做。好在我老公都（好似）睇得好開，所以大家喺呢方面都冇乜性格不合。

　　因為從小接受嘅家庭教育（就係冇乜教育）關係，我不嬲對一個屋企有乜嘢需要冇乜概念。細個我阿嫲餐餐都係午餐肉、豆豉鯪魚、咸蛋、皮蛋、南乳或者豬肉蒸豬肉（總之所有可以放入電飯煲蒸或者一開即食嘅嘢）任擇其一，所以我對屋企飯冇乜留戀（雖然都食到我肥屍大隻），對食物嘅食味同營養等近乎冇要求。嫁咗之後我偶爾都會煮下飯，但基於經濟原則（我每次買餸都買得好豪，買隻蛋都買得貴過人，我煮一餐可以出街食一個禮拜），所以我好少日日煮。難得我老公（自稱）鍾意煮嘢，又煮得好食，我自然樂於讓出廚房。

　　家居清潔方面，都係由於細個嘅家庭教育，所以要求甚寬。不過我成日覺得一個人家居太乾淨對身體唔係幾好。成日見果啲過敏症小孩多數都係有錢仔，屋企工人一日打掃四次咁。我而家身體咁好（自認），我覺得都係因為細個屋企夠污糟。所以我成日都同菜生講，第時生左仔要放佢喺垃圾場或公廁生活一排，係有其理論（？）基礎的。不過而家養左狗，唔想菜狗由白變灰再變黑，所以我都「諗住」吸多啲塵抹多啲地。

　　洗衫方面，我以前屋企係日日洗嘅，因為人多。而家一星期一次，因為衫多。洗得太密著黎著去都果幾件衫，洗疏啲可以著盡啲啲衫（ＯＫ我認呢個理由係我啱啱諗到嘅）。同埋我在家工作，衫都唔使著咁滯，一星期都冇兩件衫要洗；我老公啲底褲仲多過百貨公司內衣部，所以一定唔會一條底褲底面加側邊著四日，唔使擔心。同埋衫污糟左就係污糟左，擺多個禮拜佢都係污糟，咁如果擺耐啲會再污糟啲，一洗乾淨晒仲抵添。

　　唔做家務嘅另一個潛意識原因，係因為唔知幾時聽過人講（好似係黃淑儀講），你日日煮飯比老公食，老公唔會珍惜，之類。當然呢個只係一個迷思，男人衰起上黎你日日煮飯佢可以話你黃面婆，你唔煮飯佢又可以話你唔顧家。不過呢種觀念對我都不無影響。未至於話會特登因為要「吊住個老公條癮」而唔做家務，但始終唔覺得呢樣野係咁重要。總之都係抱持住「自己想做嘅時候就去做，無謂勉強，抹少日地唔會死」嘅原則做人。

　　總括黎講其實我結左婚同未結婚對家務嘅態度冇乜分別。我諗可以保持住自己個性同價值觀「五十年不變」，呢個都係我選擇嫁比菜生嘅一個原因。

1. 大就是好－－全世界最大一面國旗，真係好犀利，強調左大約二百次，仲要啲制服青少年對國旗宣誓，效忠國家，願國家永遠繁榮，差在未講萬歲萬歲萬萬歲。
2. 多就是好－－十萬人大合唱。中國啲表演永遠都係大堆頭人海戰術取勝。原來剩係四川都八千萬人，唔怪得啲大陸人睇唔起香港。
3. 老就是好－－講啲歌啫。年年國慶都必唱：《歌唱祖國》，仲有咩「社會進步就是好」之類（差唔多歌名，唔記得exactly），仲有劉華《中國人》，希望多少少新歌試唱。
4. 突然諗起如果第時中國唔再係一黨專政，真係變左中華聯邦，唔知啲立國年數會唔會由頭計過。如果話今年係中國唔知幾多千年國慶，我諗我會更加開心。

　　因為尋晚打機打通宵（玩完喇玩完喇，打爆CLANNAD最終大佬古河渚喇！！！都唔係好勁啫，打小頭目岡崎老豆果陣我喊得勁ｄ），所以今朝成朝同周公子一齊，冇睇日食。但係一起身FACEBOOK已經被日食洗版，個個都睇到日食！

　　咁頭先同我喺工作上嘅中頭目MSN，佢都講起冇睇日食，仲從玄學嘅角度指出日食係唔好嘢。咁又令我諗起，以前其實久唔久都有ｄ日食月食咁，都唔覺咁多人睇到，今次咁多人睇到，實有啲嘢！再加上最近幾次打風都係星期六日，平日上班日鬼咁好天，所以可以斷言，就黎世界末日！！！

　　如果真係世界末日，我相信只會剩低果ｄ冇睇過日食嘅人！所以我想喺度統計下有幾多人可以成為新世界嘅阿當同夏娃！好在我老公都冇睇到，到時都算有個伴；菜狗成朝喺廳，而家又反晒肚咁訓喺梳化（頭先出去又見佢攤咗喺地板），真係唔知佢係咪睇日食中左招。

　　雖然新世界會少咗好多人，但係我地會同心協力將個世界搞返好佢架喇！我地唔會再重蹈覆轍，比地球受污染，唔會繁殖咁多變型純種狗出黎，同埋一見到ＰＫ同ＭＫ就會即刻拉佢去絕育唔比佢繁殖，大家放心啦下。

　　但係事情可能唔係咁簡單，有可能睇過日食嘅人唔會消失，係會比啲日食輻射線變晒做喪屍之類！咁就大鑊了！到時就真係I am legend了！

　　講起日食，我就諗起冰河時期（文科人的跳躍思維）。以前我都同人講過，如果冰河時期再黎，咁首先絕種果啲應該係用唔知彩光定激光脫晒身上啲毛嘅女人！因為佢地生唔番啲毛出黎，冇得保暖，好危險！不過如果冰河時期唔黎，佢地唔絕種，就好有可能進化成新類型人。果種人全身都會光脫脫，好似鹽蛇咁，因為對佢地黎講「毛」完全冇用，所以唔會再生！

　　講起就想用呢樣野黎寫篇小說，唔好抄我橋呀下，或者抄左之後喺扉頁鳴謝番我都ＯＫ。

　　唔知有冇講過，上網睇到嘅真人真狗真貓真事：

　　話說有個主人屋企養左一隻狗同一隻貓，隻狗好爛玩，成日纏住隻貓玩，咁貓呢家嘢你都知啦，人都唔睬何況狗，所以成日覺得隻狗好煩。咁有一排，個主人返到屋企就發現隻狗喺個浴缸度跳唔番出黎，就覺得好奇怪，以為佢自己跳入去玩，跳唔返出黎。點知有日個主人放假，發現左事情嘅真相：其實係隻貓知道隻狗跳左入浴缸跳唔返出黎，所以特登引隻狗跳入浴缸，然後自己就走左去，等隻狗唔使煩住佢。ＸＤ

　　呢啲性格你話我點會唔鍾意先。一直以為自己會養貓（方便、性格正，同埋超級鍾意加菲貓），點知養左狗。狗呢家野，最醒都係係咁望住Ｄ公仔等你拋比佢玩呀、特登FING個公仔入禁地（例如廚房）借Ｄ意扮執番走入去呀、特登碌個波／KONG入床下底或櫃底等你幫佢執番玩9你呀之類。剩係識做呢Ｄ cutie嘢，掛住玩，好鬼傻，好細路。唔似得貓咁老謀深算。

　　另外貓比我最深刻印象就係玩美少女遊戲嘅時候，會變做人嘅動物永遠都係貓。例如《天使小夜曲》裏面個魔法少女其實係隻貓變嘅（因為佢Ｄ主人死晒，所以變做主人個樣，點知變變下以為自己真係人）；《美少女夢工場唔知第幾輯》女主角如果喺街執隻貓返去，第時有機會嫁比貓國王子；《Clannad》個男生宿舍管理員美佐枝嘅初戀情人又係貓變嘅（因為要代死去嘅主人向美佐枝報恩，又係變變下唔記得自己係貓，以為自己係人）。最近又玩番《CLANNAD》，上次玩果陣玩到我好傷心嘅風子線今次我又冇乜感覺，反而玩美佐枝線仲係喊到死。玩到自己偷偷瞓喺床度啜泣，隨手搵床頭櫃頂果啲用過嘅化粧棉黎擤鼻涕，而旁邊菜生則仍然十分熟睡，完全唔理我嘅感受。

　　而最近令我印象好深刻嘅就係見到織織喺個BLOG度話佢隻黑貓檸檬喺佢房門前守衛住唔比小強入侵，睇到我好激動，想養貓嘅慾望提升1000%，因為小強真係我嘅極大宿敵。回想番菜狗果晚見到隻烏蠅飛黎飛去，佢個頭擺黎擺去，係咁望住，我同菜生不斷鼓勵佢去狩獵，但係佢最後都係匿埋喺梳化底，真係不肖子。

　　希望第時等菜生對貓嘅偏見減低，會有機會養貓啦。希望到時菜狗同貓貓相處和洽，貓貓教菜狗對付曱甴啦。

　　頭先夜晚，菜生一返黎就好眼瞓，瞓咗。我喺廳食嘢，睇《頭條新聞》，七點半返工。入房換衫，開晒燈，菜生都冇反應，我驚起上黎，用手指探下佢氣息，好似有。冇咁易死掛，於是返工。

　　一路做嘢，菜生都冇打黎。我諗緊佢唔知會唔會死咗，可能喺飛機感染到退伍軍人症之類。唔知會唔會一返到屋企發現佢全身凍晒，或者已經成身藍晒。咁我就要係咁搖佢，大叫「老公老公」咁希望搖番醒佢啦。

　　但係佢最後可能都會死左。咁我後生遙遙，實會再嫁啦。應該會參加啲活動識下男人咁。如果到時再嫁，生咗個仔，我會叫個仔叫菜爸菜媽做爺爺嫲嫲嘅都，希望咁可以安慰下佢地啦。

　　突然菜生打黎，原來冇死。

http://appledaily.atnext.com/template/apple/art_main.cfm?iss_id=20090419&sec_id=4104&subsec_id=11866&art_id=12656399

　　其實我本來以為，一個人讀書少沒什麼關係，見得人多人生經驗豐富自然見多識廣，說話也照樣可以頭頭是道。

　　不過這則新聞又令我改變想法了。

　　但最令我奇怪的不是成龍，他會說這種話其實很符合人物個性，正如吳君如亂講話，是「天要下雨，娘要嫁人」的道理。奇怪的是為什麼這種會議會請他，然後為什麼正說著創意產業又講到政治頭上。

　　真的覺得可能是有人在陷害他，簡直開始有點同情他起來了。

　　晏畫喺屋企煮飯時發現，廚房窗台有隻四腳仔。又唔郁又唔盛。

　　因為對四腳仔嘅接受能力較高，而且佢好細隻，個樣冇乜威脅性，所以只係一路煮飯一路望住佢，驚佢睇唔開跳入煲嘢度，一拍兩散。

　　如果係曱甴，就絕對唔會再行入廚房零點一步。

　　菜生部相機真係幾好，zoom到咁近影都算清。本來想post大圖，但自己都有啲頂唔順，所以都係細圖算。

　　但頭先放大嚟睇，先發覺佢好似瓜咗 =_=b 唔怪得幾個鐘都唔見佢郁。

　　當然係等菜生返嚟善後啦。

　　因為就搬屋，地方大啲，想領養小狗，先發覺其實都幾多可愛狗比人遺棄。

　　松鼠狗又有，北京狗又有，約瑟爹利又有，史納莎又有，金毛尋回又有，唔明啲人點掉得落手。

　　最近發現八哥都有。八哥好似都名名地種喎下話？我諗好快連貴婦狗都會有。

　　最慘我覺得係雪撬狗……喺香港生活已經係好好好好好勉強，仲要被人遺棄。

　　你話人有乜資格去享受自然資源丫？人其實真係地球上嘅大害蟲。

　　最後俾大家睇一個七隻小狗被遺棄嘅故事……祝願新嘅一年果個主人得到佢應有嘅報應。

　　七隻無辜的狗狗

　　如果我中了下期六合彩，有七千幾萬，我會：

• 立即全部買晒匯豐，每年以股息生活，不會買樓
• 死左之後，筆錢分成三個基金：
• 第一個，頒比每年扮消防車聲扮得最似嘅狗；
• 第二個，頒比每年最搞笑嘅人；
• 第三個，頒比每年鬧人鬧得最好嘅人。

　　希望上帝睇完我個proposal之後會比我中啦。