| W.W.'s profileWW @ 30sPhotosBlogLists |  Tools  Help |
|
|
11/19/2009 直播打機最近發現一個網站，啲人可以直播自己喺電腦做緊乜。有個台灣人直播自己打機情況，真係令本人萬分感動呀～～好一個對武俠ＲＰＧ有大愛的人啊～～～我幾乎次次上親網都會上去望下，無論早、午、晚、深夜，佢都係打緊機，學同工自然都唔使返，直頭飯都唔使食咁。我只係睇左短短幾日，已經見佢爆左三個ＧＡＭＥ，打緊第四個，真係令人慚愧萬分呀！！！好想效法呀！！！！ 因為係直播佢部電腦做緊乜，所以時不時都會見到佢上網搵攻略。例如下圖果個音樂地板就搞左佢好耐（而家仲未搞掂），可見呢位大俠並非打機勝手。講起上黎呢個ＧＡＭＥ其實我都玩緊未爆，因為我有個非常唔好嘅習慣，就係打機打到就爆果時會ＤＵＭ波鐘，唔捨得佢完，所以好多ＧＡＭＥ都係玩到最後，玩唔爆。 http://zh-tw.justin.tv/nagisa36605
另外尋日見到有人直播自己玩school days，想當年呢個ＧＡＭＥ嘅賣點係全動畫Ｈ－ＧＡＭＥ，但尋日我睇左一陣，發覺啲動畫真係好流下囉，基本上剩係得啲換鏡同個嘴喺度郁，以「動」畫黎講都好唔動下，啲公仔又唔靚，好在當年冇嘥時間玩啫。不過可能Ｈ場面好動都唔定，咁我又唔知啦。 10/27/2009 宮心計
第六集咋，雖然個結尾係大團圓，出晒大合照咁，但係未完架，有排捱呀。 唔好睇嘅呢套嘢，好明顯係「參考」《大長今》呢樣野就人盡皆知，但與此同時參考埋粵語長片真係估佢唔到。尋日果集講米雪同關菊比麗麗陷害，最後竟然出動到怡楊同阿蛇加埋老穎扮鬼去嚇到麗麗鬼拍後尾枕講晒個真相出黎。一個唔覺意以為道布簾一跌低坐喺後面果個係包大人－－咦包大人呢招唔係狸貓換太子果單案用過一次咩？ 呢幕一定唔係參考《大長今》啦。如果呢套劇賣埠去韓國唔知會唔會比啲韓國人笑，又以為睇緊《皆大歡喜》囉。係啦中間果個望落都有啲似家燕姐。 真係咁多年都冇乜點進步，無線啲嘢。 9/2/2009 今日最震撼人心新聞紀錄了劉德華、楊千嬅及黎明已婚證據的內華達州公共搜尋網，可謂神通廣大，除婚姻註冊、離婚及犯罪紀錄外，就連屋契、信託等法律文件也可搜尋得到。本報發現白韻琴於 00年在賭城購入一幢價值約 160萬港元、近 3,000呎、兩層高的屋宇， 06年在屋契加入丈夫謝偉俊的名字，其實兩人在全球擁有多幢聯名物業，難怪今年初爆出謝偉俊與青島姑娘發展網戀，白韻琴瞬間便能將愛火冚熄。 ------------------------------ 咁乸平！！搞錯呀！！我想像唔到呀真係！！160萬喺香港都唔知買唔買到六百呎呀真係，分分鐘仲要係幾十年嘅舊樓呀！好震驚呀！！！ 前幾日睇報紙仲睇到話香港啲籠屋租金冠絕全港，呎租九十幾蚊好似。真係貧者越貧富者越富，好在呢排見到身邊多左人信主，世界末日應該差唔多到架喇都。雖然返左天家以我嘅功德都應該住唔到大屋架喇，仲要同菜生以弟兄姊妹嘅身分相處添。都係唔好末日住喇，我照住番而家呢度ＯＫ架喇，當我冇講過。 8/31/2009 漁舟唱晚漁舟唱晚我都好鍾意架
好似真係上左隻漁舟度浪浪下咁架
其實我對音樂悟性好低
好多時聽左都唔知聽啲乜
唯一係漁舟唱晚同江河水最有feel
特登揀呢段肚兜美女彈嘅片
吸引各位收看 8/30/2009 江河水
聽日上古琴，所以上Youtube搵啲古琴曲聽聽拎個feel。 搵搵下突然想聽番《江河水》，係我僅有幾首叫得出名嘅中樂曲其中之一。 我曾經都識拉架呢隻，好耐之前嘅曾經XD 同埋果陣都拉唔晒成首應該。 慘到ＰＫ，每次拉都覺得大傷元氣，聽都會小傷。 喺房睇呢段嘢果時，本來匿喺客廳梳化底嘅靈犬菜狗都走入黎望下咩事，仲望住個MON一陣，可見幾震撼，狗都震撼到。 8/26/2009 睇完黃子華 買左最貴飛呀，都好近（但係其實最平飛都唔係好遠ＸＤ下次可以一試），雖然四面台，不過黃子華都轉動得幾勤，唔似得上次睇周杰倫全程睇背脊。但係唔係四面台就更好啦，唔鍾意。
開場前見到啲人猛咁自拍，拎住部鬼咁重嘅單鏡反光（唔知係咪咁叫）機自拍……拍極都唔滿意係咁拍……我諗都幾攰下，咁重部嘢。重要果對情侶後來比人發現坐錯位（可能掛住影相冇睇清楚位號）……唔知去到啱嘅位使唔使補拍。
啱啱開場果陣後面有個女人喺度評論黃子華啲笑話，佢講一句佢評論一句：「呢個ＧＡＧ有少少回。」「呢個ＧＡＧ有啲爛喎。」哇幾驚佢全場都會咁，我諗我殺人都有之。好在冇，講左兩句就收左聲。後尾聽到佢同同行友人都係基督徒（話佢地間教會都ＢＯＯＫ得起呢個場啦乜乜物物），係啦大家主內弟兄姊妹好黎好去丫嘛。
麻麻地好笑咋我覺得（不過我冇喊架唔使擔心），頭果ｐａｒｔ講咗啲文學嘢，又三國又紅樓夢，真心覺得上堂播都得，可以用黎講下林黛玉嘅性格。
第二ＰＡＲＴ好笑啲，講寫ＢＬＯＧ好笑呀，話啲人當自己係傳奇，寫嘅係傳記，所以咁想人睇；又話啲人早餐食左碗餐蛋麵都影張相放上網，即係話我啫，車。
講放狗執Ｃ都好笑啦。不過我冇執Ｃ好耐ＬＵ。
唔知係咪因為第二場所以未熱好身，好似有啲拘謹咁……下年買尾場。
係呀，買埋《越大鑊越快樂》ＤＶＤ喇，送月曆添，幾好。買果陣竟然有個女仔問有冇今場賣，比個售貨靚妹串話「今場都未做」，其實人地想問有冇今場嘅Ｔ恤賣啫。
走果陣又有亡命小巴直出旺角，香港交通真係方便。 8/15/2009 睇電視 冇人發晒癲咁同我一齊追電視真係慘，搞到我都冇乜睇電視嘅動力。老公基於禮貌都會陪我睇下，但係我完全感覺唔到佢對電視嘅熱情囉唔該！睇電視都要比啲heart架你明唔明？
最近睇緊黃子華套新劇，因為之前《奸人堅》真係太咩喇，所以冇乜期望，但呢套又幾好睇喎。不過我唔係咁鍾意個女主角囉。比番鄭裕玲或者菜少芬佢啦不如。想睇番《棟篤神探》添。
因為覺得幾好睇，所以今晚返左工，返到屋企我都特登上mytvb睇番。發明mytvb.com條友可唔可以受我一拜呀？你真係太醒喇！造福世人呀！本身雖然我屋企係有部harddisk錄影機，但係因為轉左高清，所以用起黎好麻煩，都好耐冇用過。而家有mytvb真係太正喇！雖然有啲人話會lag但係我睇又ＯＫ，有得睇我就劏雞還神喇真係。唔知米國人同楓葉國人會唔會睇到呢？睇到咪唔使落強人街買碟囉。
頭先喺mytvb睇完《絕代商驕》，禁禁下先睇到原來明珠台啲劇都有播。因為鍾意睇推理／偵探劇所以睇左套Mentalist（其實係得呢套同２４有full version播，但我極不喜２４），好正喎！但係因為mytvb得二三四五集，所以千辛萬苦又上網搵番第一集黎睇，好睇喎。而家有埋美劇睇真係正，無線啲字幕又譯得好可以學埋中英文。如果多啲英文台節目就好啦。
劇集方面大致係咁啦，另外仲睇緊亞視第二百七十二次重播嘅《還珠格格》。今日問菜生有冇睇過，佢竟然可以話冇。話說當時亞視基本上已變成《還珠格格》台，除早午晚深夜各播一次外，星期六日仲會推出完整重播版，一口氣重播番星期一至五共五集架嘛，咁都避得到，菜生真神人也。
講起上黎呢，而家重播嘅《還珠格格》，好似呢，都會秉承番十幾年前嘅優良傳統，喺星期六一口氣再重播星期一至五嘅集數架喎。真係問你怕未，亞視真係好豁出去，好似唔預有人睇佢咁。見你係咁我就支持下你啦，聽日我一於睇。
不過呢套真係睇得過架。我本身好唔鍾意瓊瑤野但係呢套幾啱睇。下次唱Ｋ可以考慮唱埋首主題曲同插曲，雖然上次都唱過。
卡通片方面，喺電視追緊嘅只有《鋼鍊ＦＡ》，不過實情覺得麻麻地。但追開就要睇埋呢個係我原則。而家夜晚播緊啲Keroro係我未睇過架，不過又冇乜意欲去追，我終於都長大了。
其實人大左都未必一定懷舊架喎，好似而家Ｊ２做KERORO前會播《ＩＱ博士》，我就完全冇意欲睇，有時立一兩眼都唔想再睇。其實我都幾高度懷疑當年譯對白嘅人可能未必真係咁識日文，因為啲對白同劇情實在太九唔搭八。
呀係呀，我星期六仲會睇《我們這一家》，不過有時有事睇唔到都會隨緣唔睇。另外就黎播《魯魯修》第二季喇，雖然啲人話唔好睇但係我睇左第一季都會睇埋落去。
同埋我想問呢，暑假前成日宣傳話會播《鬼太郎》，都唔覺嘅。死啦唔知係咪播左我冇睇，我真係超級期待架嘛。Miss咗我會好唔開心架喎。
另外今日《Last Friends》結局喇，日劇黎架唔係Friends呀。其實我以為一早結局左，因為都有好幾集冇睇。呢套真係麻麻，幾悶下。不過見係結局又睇埋佢啦。
之前《東張西望》成日宣傳叫啲細路參加咩「TVBuddy同學會」，幫TVBuddy設計個朋友之類。使乜啫，畫我個樣上去囉，我就係ＴＶＢ嘅最忠實朋友。 8/8/2009 海貓鳴泣之時 七月新番，都幾好睇。
個ＯＰ好有氣勢。不過ＹＯＵＴＵＢＥ呢個唔夠大聲。
雖然有歌詞但係我鍾意另一個中譯本，尤其最後一句：「你如此殘忍 而我將受到的懲罰又有多重？」好詩化。
歌詞：
Il giudizio vien dal mare sta fra tre streghe immerso （裁きは海より齎され 三人の魔女の狭間に潜む） Nessuno può liberarsi dal peccato che nelle vene （何人も逃れられぬ 血脈の咎からは） 海鳴りの調べに 黒雲は空へ集う 嵐を呼ぶ風は高らかに 謎めく言の葉に 魔女達は含み笑う 歪な夜の宴は繰り返す sta nel mare（海が水底にある） 奈落へと堕ちる Il peccato（それは罪） 金色の蝶を いくつの罪に翅を濡らしてゆくの 泣かないで 囚われた幻想を壊し 一度きりの終焉を挙げよう 果たせない約束が胸の奥焦げ付いて 赤く赤く爆ぜてくよ Tu sei senza pieta ma quanto sarà pesante il mio castigo? （無慈悲なお方 私の誅罰の重さは如何ほど？） 中譯歌詞： 判決來自大海並且它即將浮出水面 誰也無法逃脫流淌在血液中的罪孽 海浪之歌 令黑雲聚集 風在高聲呼喚暴風雨 充滿謎團的話語 令魔女們含笑 扭曲的晚宴反覆舉行 處在邪念之中 墮入深淵 罪孽阿 金色蝴蝶 羽翼也被多重罪孽侵染 不要哭 破壞被捕獲的幻想 迎接僅有一次的終結 無法履行的約定烘烤內心深處 手掌已滿是血紅 你如此殘忍 而我將受到的懲罰又有多重？ 而家完左ＥＰ１，「海貓鳴泣之時，無人生還」，開始ＥＰ２。
遊戲ＥＰ１結局Ｄ配樂好強，搞到我又想試下玩，不過啲公仔好樣衰咁，同埋係獵奇嘢，我驚驚地核突。
動畫節奏好快，黎唔切驚啲人已經死晒。
ＥＰ２又要睇佢地死多次，ＥＰ３再死一次，ＥＰ４再死一次。ＥＰ５好似係解謎篇，好似係。
好想知道結局點收尾。 碧綠色的兔仔其實我都幾鍾意酒井法子。
初初聽到話懷疑佢投湖自殺，真係好不安。
如果佢死我諗對我嘅衝擊肯定大過ＭＪ，
可能因為我係電視精。
後來話佢喺老公藏毒被捕後失蹤，
又好擔心佢，驚佢做傻事。
又覺得佢好慘，女人最怕嫁錯郎。
總之好同情佢。
跟住而家話喺佢屋企搜到毒品，
懷疑佢都有份吸毒，
但我對佢印象依然極其正面，
覺得實係佢個衰老公帶壞佢啦，
唔單止帶壞佢仲要爆佢吸毒，
真係賤男一名，
對法子仲同情過之前。
唔係好理性但感性上真係硬係覺得佢係好人，
佢喺我心目中仲係柏木小雪同彩兒，
（雖然《星之金幣》第二輯又盲又聾又啞太誇所以冇睇，
但我而家仲識做「我喜歡你」嘅手語架）
所以做戲黎講做到個好角色你話幾緊要。
（講起之前套真人小丸子要佢做小丸子老母我真係好替佢唔抵，
佢未至於下話）
無論如何希望佢快啲出番黎啦，
唔好就咁失蹤幾十年呀。
戒咗毒都係一條好漢，
快啲出番黎啦唔該。 哈利波特今日同青、康、琦喺ＡＰＭ睇左哈利波特。 又遲到ＳＯＲＲＹ呀，呢排成日遲到，好憎，以後要早半個鐘出門口。 ＡＰＭ百老匯啲位幾闊落，初初聽到第五行都驚太前，但因為啲位喺斜路上所以ＯＫ，但再落一行應該唔多掂。 套戲好睇喎，我會覺得係咁多套最正，可能因為Ｄ角色大個晒，所以心理複雜啲好睇啲。同埋啲電腦特技都好睇，氣魄幾宏大下。 仲有啲選角真係幾好，除左主角真係越大越乜乜之外（回想番佢細個真係幾可愛下），其他都好好。Ginny細個個樣普普通通大咗又OK喎。Luna又夠晒迷幻。Hermione身材真係fit到呢……仲有Ron超好笑囉，而且仲成長成為我最鍾意嘅大隻男，正。奸角方面細個嘅Tom Riddle同埋有個女奸角（好似魔街理髮師個女主角）都幾夠奸，雖然後者卡通左少少。 不過見到個女教授（今集成集都冇叫過佢個名 =_=b）真係老左好多好多，歲月催人。 劇情方面始終都係太趕（而且好多好角色出一出就冇）。不過都算幾連貫啦，只係有啲感動位鋪墊唔夠搞到唔夠感動（不過都已經有啲人喊，我都喊喊地）。另外笑位幾夠呀，Ron真係超正，希望佢繼續拍戲唔好退休住啦唔該。 下集大結局希望佢拍好少少啦，好似魔戒咁分幾集我都唔拘，不過如果叫埋菜生去睇佢實喊。前年買左Harry Potter and the Deathly Hallows（仲要預訂）但到而家都未睇。希望快Ｄ可以睇埋佢。 其實最想係喺戲院睇變型金鋼但落左畫lu，好慘。 7/11/2009 純種狗的悲歌 慘到ＰＫ呀啲純種狗。等我之前仲話想買king charles，如果養養下見到佢變成咁，真係我死好過佢死。最賤係啲人明知啲狗有病照拎去配種，仲要佢地亂倫，搞到病上加病。仲有啲狗展果Ｄ評審標準……啲評判係咪眼（定腦？）有事呀？？？點解會話啲畸型嘅狗係靚？仲要將佢地代代配種，等佢地一代一代咁畸形同痛苦落去？點解點解點解？點解人類可以咁厚顏無恥？上帝要人類管理萬物，就係咁管理？到將來向上帝交賬嘅時候，呢啲人會有咩結果？
7/7/2009 Pedigree dogs exposed提自己睇電視：星期四晚八至九明珠台， "純種狗的悲歌" (Pedigree dogs exposed) (a BBC programme) 此節目講述因人們追求"純種犬", 把狗隻近親繁殖, 令他們出現各種遺傳病, 承受極大的健康問題及痛苦. 自從節目在英國播出後, 引起了很大的迴響, BBC決定抽起Crufts狗展的播放, 而Kennel club亦從狗隻健康出發, 將一些品種的 "標準" 作出修改, 以其健康為先而非外觀! (節目簡介FROM http://forum.baby-kingdom.com/thread-2423910-1-1.html） 5/13/2009 萌的真諦4/30/2009 宅人必修 亞視竟然唔聲唔聲播幸運星……
適宜配合涼宮春日一同服用。最衰唔係喺無線播埋。
不過睇套卡通片都可見亞視大方過無線，例如啲對白提到無線套《婚紗小天使》都冇遮遮掩掩，照講，唔怕話幫人賣左廣告。
最鍾意嘅角色一定係此方啦。因為同我一樣咁鍾意玩Gal Game （尤其是KANON！KANON！KANON！成日提到！搞到我又想玩番！我同佢唔同嘅係我唔打online game……尤其唔會同班主任一齊打XD ）又一樣咁鍾意臨急抱佛腳（不過我唔會抄功課）。如果論宅度我當然比唔上佢啦……
套卡通頭幾集真係要有愛先捱得過，因為成日影住三個女主角小息喺班房傾計，一傾就傾成十分鐘，角度都冇變過ＸＤ搞到菜生睇咗幾眼後就話無聊到笑 =_=b 但第四集開始就ok喇，事件豐富ｄ。情況有ｄ似當年笑園漫畫大王……講起黎兩套野都有個講關西腔嘅人喎。 4/20/2009 金像獎 還我完整版！！！
我都奇怪點解廖啟智得左獎唔感謝神架喇……
蕭芳芳拎完獎致辭又得咁少……
如果要cut不如cut晒啲睇到人好尷尬嘅偷燒鴨／鵝／雞好過啦……
樊生講粗口又唔cut……
嚴重質疑佢地cut野嘅標準……
下年比亞視播啦，冇人睇好過比人咁樣蹂躪丫…… 4/13/2009 世界奇妙物語09春之特別篇炸彈男的開關：麻麻！比我一早炸瓜果個弱雞孱仔！
輪迴之村：ＯＫ！結局出人意表！
智力問答的天堂地獄：搞笑！如果個世界真係咁，我都幾有信心做到特首！
深夜裏的殺人犯：推介！以後女仔向男仔提出無理要求時要小心！同埋以後見到Ｄ浪漫野不妨諗下背後發生過咩恐怖事！
從天而降的志願者：麻麻！少少老土！
|
|
|
