| W.W.'s profileWW @ 30sPhotosBlogLists |  Tools  Help |
|
11/9/2009 又講洗衫先 忍唔住，不過唔關人事，自己懷緬過去啫。
喺我嘅人生黎講，最光輝嘅洗衫日子應該係住禾輋邨果時。因為禾輋邨係果Ｄ有天井嘅公屋，而且屋企又有個好通風嘅騎樓，所以洗完啲衫既可以晾喺騎樓，又可以晾出欄杆，有太陽直曬，晾完啲衫真係暖笠笠，有陽光香味。
最初屋企好似冇洗衣機，定係有但係我阿嫲唔識用，所以都係佢用手洗。沖涼又係果個盆洗衫又係果個盆。後尾阿媽會用洗衣機洗，個洗衣機係開蓋嘅，洗衫時會睇到機入面啲漩渦，會見到啲水變灰色，有時會伸隻手入去玩下，掹番起隻手時會聞到啲污水臭味，真係好玩唔玩。
後尾搬左去私人樓，冇地方晾衫，阿媽會晾喺佢自己間房，因為佢間房嘅天花有條鐵柱，原本係用黎將間房分開兩邊。但果條鐵柱都唔係幾夠用，有時佢會晾喺啲書櫃度，總之掛到衣架嘅地方都晾。以前禾輋部洗衣機我都識用，後尾呢部反而就唔識，完全冇掂過。另外因為啲衫晾喺室內，所以好多時會晾到啲衫好臭，因為ＵＰ住啲衫滋生細菌嘅關係。
喺大角咀住果時屋企太細，冇位擺洗衣機，所以啲衫拎出去洗，一次大概廿幾蚊，大約兩個星期一次，無憂無慮。
住左美孚，租屋連埋洗衣機，用得唔好嘥，所以開始洗番衫。最初晾喺廁所，但後尾啲衫又開始ＵＰ出臭味，同埋有時啲衫晾成個星期都唔乾，頂唔順，買左部有乾衣功能嘅抽濕機。因為個書房冇乜用（我係work in bed嘅），所以就用書房晾衫（因為抽濕機需要喺密閉空間用）。但一次都要抽幾耐下，內衣褲比較快乾，通常一日搞掂，面衫果啲就最少兩日。而床單果啲比較大型嘅物件都係要拎比人洗。
將來希望一係有乾衣機，一係有天台或夠大嘅露台比我晾衫，呢個係我人生最終極嘅願望。 菜狗與冷 Post 埋喺度等老爺奶奶都睇到。
11/7/2009 忙到冇朋友今日，一早去返工。因為節目調動關係，而家每星期只返一日，時間好使好多。
放工後買麥９黑椒漢堡食，唔夠汁。發現商場開左間椰林閣，細查之下原來開喺ＢＡＢＹ ＢＬＵＥ個位，ＢＡＢＹ ＢＬＵＥ執左！！！食完麥９休息左一陣又出發，又去理大護眼覆診。因為之前個視光師話我眼角膜損左，覆左幾次診都未好（免費嘅，所以唔係DUM症），好在今次冇事。但今次驗近視又話我右眼比上次深左廿五度，散光就兩邊各淺五十度。
睇完眼過海去西灣河做義工，織頸巾。
本身CHRISTMAS都話報左名做義工嘅，點知晏晝又唔見佢。本身個活動五點半完，但提早五點走，因為想返沙浸崇拜。
又拎到月刊，巧開針仔。喺教會反而見到CHRISTMAS！與此同時今日講道講朋友！唔知係咪神有咩啟示！散會時想同佢傾幾句，點知佢係咁BYE BYE我地，被朋友仔遺棄了！很慘仔！收拾心情後過禾輋商場搵飯食，本來菜生點名唔想去五十嵐，但見佢個六十幾蚊任食火鍋好抵，又去幫襯。叫左個豬骨湯底好鬼鹹，啲野食麻麻。最好食係黑豚肉。最唔好食係附送果個天婦羅，真係做左三十年人都未食過咁淋嘅天婦羅，好似炸唔透咁。
食食下好眼瞓，但堅持去埋蛋糕店買蛋糕仔先返屋企。買左一舊士多啤梨蛋糕，同菜生分。啲士多啤梨都難得唔太酸，但啲忌廉有少少怪味，五分滿分只值二點五分。
返屋企又見傻仔。上星期四沖完涼，仲尚算乾淨。
雖然好眼瞓但都要睇埋魯魯修同鋼煉先訓。 人妻的責任各位新婚人士不妨一齊交流下。 對我黎講做人妻嘅責任比較係精神上多於實務上。例如多啲同老公傾偈呀，聽下佢講爛ＧＡＧ呀，支持下佢做傻事呀，互相學習互相勉勵呀，拓闊彼此嘅眼光呀，娛樂大家呀，作發洩對象呀，有更多精神（同肉體）交流呀，諸如此類。洗衫煮飯等家務事我睇得好開，有時間就做冇時間就遲Ｄ做。好在我老公都（好似）睇得好開，所以大家喺呢方面都冇乜性格不合。 因為從小接受嘅家庭教育（就係冇乜教育）關係，我不嬲對一個屋企有乜嘢需要冇乜概念。細個我阿嫲餐餐都係午餐肉、豆豉鯪魚、咸蛋、皮蛋、南乳或者豬肉蒸豬肉（總之所有可以放入電飯煲蒸或者一開即食嘅嘢）任擇其一，所以我對屋企飯冇乜留戀（雖然都食到我肥屍大隻），對食物嘅食味同營養等近乎冇要求。嫁咗之後我偶爾都會煮下飯，但基於經濟原則（我每次買餸都買得好豪，買隻蛋都買得貴過人，我煮一餐可以出街食一個禮拜），所以我好少日日煮。難得我老公（自稱）鍾意煮嘢，又煮得好食，我自然樂於讓出廚房。 家居清潔方面，都係由於細個嘅家庭教育，所以要求甚寬。不過我成日覺得一個人家居太乾淨對身體唔係幾好。成日見果啲過敏症小孩多數都係有錢仔，屋企工人一日打掃四次咁。我而家身體咁好（自認），我覺得都係因為細個屋企夠污糟。所以我成日都同菜生講，第時生左仔要放佢喺垃圾場或公廁生活一排，係有其理論（？）基礎的。不過而家養左狗，唔想菜狗由白變灰再變黑，所以我都「諗住」吸多啲塵抹多啲地。 洗衫方面，我以前屋企係日日洗嘅，因為人多。而家一星期一次，因為衫多。洗得太密著黎著去都果幾件衫，洗疏啲可以著盡啲啲衫（ＯＫ我認呢個理由係我啱啱諗到嘅）。同埋我在家工作，衫都唔使著咁滯，一星期都冇兩件衫要洗；我老公啲底褲仲多過百貨公司內衣部，所以一定唔會一條底褲底面加側邊著四日，唔使擔心。同埋衫污糟左就係污糟左，擺多個禮拜佢都係污糟，咁如果擺耐啲會再污糟啲，一洗乾淨晒仲抵添。 唔做家務嘅另一個潛意識原因，係因為唔知幾時聽過人講（好似係黃淑儀講），你日日煮飯比老公食，老公唔會珍惜，之類。當然呢個只係一個迷思，男人衰起上黎你日日煮飯佢可以話你黃面婆，你唔煮飯佢又可以話你唔顧家。不過呢種觀念對我都不無影響。未至於話會特登因為要「吊住個老公條癮」而唔做家務，但始終唔覺得呢樣野係咁重要。總之都係抱持住「自己想做嘅時候就去做，無謂勉強，抹少日地唔會死」嘅原則做人。 總括黎講其實我結左婚同未結婚對家務嘅態度冇乜分別。我諗可以保持住自己個性同價值觀「五十年不變」，呢個都係我選擇嫁比菜生嘅一個原因。 11/6/2009 似是故人來 今日上科技翻譯，好難，學完又冇用（因為要真係識果啲專門科技嘅人先做到科技翻譯，我呢Ｄ文科人只能收皮），唔想讀。不過呢啲都係題外話。
個個喺ＢＬＯＧ都講同事，等我講下同學。同事下次有機會先品評。其實上次上第一堂我都有所發現，但今日更肯定。首先係有一個同學係我以前公司一個編輯，因為我而家都有幫果間公司譯嘢，所以都算同事，同埋之前都喺另一個同事屋企見過一面。但因為呢個同學兼同事都幾ＣＯＯＬ下，所以我冇同佢打招呼，但我諗佢應該識我嘅，唔記得樣都記得名。真係大鑊，一陣比佢發現原來我啲翻譯水平咁低（例如今日阿ＳＩＲ問我問題又唔識答），直接影響本人的事業錢途。
另外一位同學就係名人。我第一眼見佢已經認得佢上過電視，做過《窮富翁大作戰》，今日有個同學問佢做邊行，佢話做電腦，就進一步印證我嘅假設。所以幾時都話報呢啲COURSE嘅人，一係就傻人（如我），一係就有錢人（如佢）。上述果個擺到明係大老闆唔在講，第一堂我同另一個同學講起，話如果報翻譯碩士好貴，成八萬蚊，佢竟然話都唔係好貴啫，咁耐都冇乜點加過，好多人都報左，聽到我眼都突埋。我覺得八萬蚊好貴呀，我寧願執行八萬個小時社會服務令呀真係。
果個話咁耐碩士學費都冇乜點加過嘅同學仔叫貝蒂，係我喺呢個COURSE新識嘅同學仔。識到同學仔真係巧開針，大家做堂課時唔識都可以商量下。雖然都好想好似中學咁同埋同學仔一齊放學，不過一係就佢一支箭咁標左去（上次），一係就我一支箭咁標左去（今次），冇得重拾校園情懷。同埋我覺得佢有少少似放左工好攰唔想同人應酬咁多咁，所以都費事煩住佢。
大致係咁，其他人唔識。根據上次經驗應該畢業都唔會識，就係咁。 11/3/2009 寫下最近啦不如 其實就冇乜特別，不過今日突然覺得呢種日子就係最幸福嘅日子了，好似係幸福到盡，我都想像唔到更幸福係點樣，所以十年後唔知會點？會保持呢種狀態十年？定係會滑落？定原來仲有更幸福嘅狀態？
上星期六應查理伉儷之邀去左屯門劉星花園ＢＢＱ。而家啲人唔興去郊野公園透爐ＢＢＱ了，都去啲ＢＢＱ場一條龍搞掂。年初時同３ＤＤＢ佢地去大尾篤，都仲叫係自己透爐，今次去屯門，就直情爐都幫你透埋。今次天氣又係好好，好夠涼，上次去大尾篤都有啲熱，今次天氣就好PERFECT，啲嘢都幾好食，最好就係喺正個洗手盆隔籬，可見劉星（可能係青爺啲鄉里）都係個好細心嘅人。順便記下果日啲ＢＢＱ友嘅名先：ＩＤ精英晶晶、小學精英MAGGIE同SHIPPING精英KATHY，記得晒架幾勁。
尋日開始又學翻譯，但係未收到持續進修基金覆我，都唔知有冇得Claim番錢。第一階段先上文學翻譯同科技翻譯，跟住係財經翻譯同傳媒翻譯，最後法律翻譯。教文學翻譯個阿SIR有啲神化，成日跳跳紮咁，講嘢好快，聽到我尋晚好頭痛。不過佢尋日有樣嘢講得幾好，就係「翻譯一定有翻譯腔」，同埋翻譯係為咗將外來事物引進，所以係應該喺縮窄兩地差距之餘盡量保持原文。同埋叫我地唔好用咁多成語囉。細細個背埋咁多原來冇用，真係好大打擊。
日文繼續堂堂默書，隔堂小測。Miss都教得幾好，同埋雖然咁講有啲唔好意思不過我幾鍾意呢個Miss嘅身材 XDDDD 有肉地得黎唔肥（我覺得，但係以港女標準可能又唔同講法），好似好好攬咁（希望佢唔會見到呢段形容，如果佢見到我要補充一句我結左婚喇，你唔使驚）。同埋個Miss有時又會講啲cutie嘢，做啲cutie動作，但因為佢個樣穩重得黎都帶點cutie，所以又唔會覺得好肉麻。所以話識日文真係人都cutie啲，值得一學。
古琴停左幾星期（因為去米國同重陽節）終於復課。彈得麻麻，機械聲咁，所以老師上堂就教我點樣將啲感情貫注落啲音樂度。咁我當然係唔明啦，佢亦都繼續係唔知點解釋比我聽。所以都係隨遇而安啦。
工作方面都係咁，啱啱又接左舊筍嘢，又可以幫補下。其實而家嘅工作量係算適中，生活得好舒服，又有時間溫下書，不過自己又隱隱有啲不安因為硬係覺得賺唔夠，同埋獨沽一味剩係幫一間公司做又覺得唔穩陣，但係你話搵多份又好似忙得滯，冇得享受下人生，所以雖然都見到啲兼職招聘廣告幾啱做但係始終猶疑。不知點算好。
菜狗方面前幾日咬左菜生一啖。事緣菜生份人好煩，呢樣嘢人盡皆知。佢成日都自以為係同菜狗玩緊，但其實係煩緊佢。前幾日佢又煩住菜狗，菜狗已經輕輕咬左佢一下示警，然後匿埋入梳化底，但係菜生仲唔死心兼且好蠢地伸隻手入去想捉佢出黎，於是菜狗就動真格的咬左菜生手指一野，咬到流晒血。雖然係好抵死但係我都驚佢會感染到啲咩細菌之類，不過過左幾日冇事應該冇事掛。
屋企方面冇乜嘢，呼應番阿板一星期洗三四次衫嘅宣言，我希望我屋企一星期可以洗一機衫，今個星期洗底衫下個星期洗面衫咁，唔好用咁多水咁多電，為環保出一分力。
心情方面本來秋天我就應該好好心情，但係呢幾日因為朋友屋企出左事所以我都唔係幾開心，好嬲怒。但我都幫唔到乜嘢手，只可以喺禱告上記念。希望佢嘅問題可以快啲解決，同埋希望世上嘅衰人快Ｄ死晒佢。另外自己娘家賣緊樓，但係而家個個唱淡樓市，未必賣得出，又未必賣到好價。我阿媽有時都幾黑仔。 10/30/2009 頭暈暈，發夢上深圳 尋晚個頭突然好暈，又嘔咗成晚。
傍晚開始暈暈地，菜生返黎後勁暈（唔係見到佢暈陀陀果隻暈），又勁嘔又十幾次（唔係見到佢作嘔果隻嘔），嘔到屋企啲膠袋都冇晒，最後要出動垃圾袋。最衰係膠袋徵費計劃搞到冇晒超市膠袋拎，唔係可以嘔多幾次。
因為尋晚未食飯就又暈又嘔，所以都冇乜嘢嘔到出黎，得啲水。到最後嘔埋黃膽水，但竟然係甜嘅，因為呢排食得糖多。
我覺得頭暈同嘔係最辛苦，仲辛苦過頭痛，因為頭痛有得食必理痛但頭暈又冇必理暈，好慘。好在我老公話唔想生仔（唔關我事，我唔抗拒生），等我嘔少啲。
暈左幾個鐘，九點幾先好啲，差啲叫白車。冇叫白車係因為驚唔知係咪餓得滯頭暈。但係餓得滯頭暈應該唔會嘔掛？如果唔係咪：
餓－＞暈－＞食嘢－＞嘔－＞更餓－＞更暈－＞更嘔－＞（無限loop）
因為作嘔所以最後剩係食左一啖飯，但又唔覺得好餓，照瞓。
瞓著後發夢上咗深圳。首先係發夢搭果班火車唔知做乜壞左，回應番現實中港鐵成日故障嘅新聞。因為壞左反而可以搭一班舒服嘅特快列車，但係都係冇位坐，得企位。返到深圳，我阿媽上面買左樓，喺度執緊嘢。佢屋企樓下有個商場，有間Precious慕文，阿媽見我之前喺間嘢買左唔少卡仔果啲，叫我落去買個生果籃，儲夠分申請做會員。於是我落咗去睇，基於我本身其實好唔鍾意Precious慕文啲嘢，所以睇唔啱，個生果籃放咗喺收銀處，我哄埋去睇幾錢，睇極都睇唔到，反而見到幾個中學舊同學，我即刻匿埋，因為我當時身穿中學校服，覺得好樣衰。
大致上係咁。跟住起身做埋尋日頭暈做唔晒嘅JOB，個頭都係有少少少少暈。今次我要特別鳴謝我老公，因為我個人一病就變身drama queen，啲反應誇到爆，成晚喺到大叫話自己就死，又會詐喊咁，好煩。以前未嫁時我阿媽見得多，而家輪到老公，真係慘。 10/27/2009 宮心計
第六集咋，雖然個結尾係大團圓，出晒大合照咁，但係未完架，有排捱呀。 唔好睇嘅呢套嘢，好明顯係「參考」《大長今》呢樣野就人盡皆知，但與此同時參考埋粵語長片真係估佢唔到。尋日果集講米雪同關菊比麗麗陷害，最後竟然出動到怡楊同阿蛇加埋老穎扮鬼去嚇到麗麗鬼拍後尾枕講晒個真相出黎。一個唔覺意以為道布簾一跌低坐喺後面果個係包大人－－咦包大人呢招唔係狸貓換太子果單案用過一次咩？ 呢幕一定唔係參考《大長今》啦。如果呢套劇賣埠去韓國唔知會唔會比啲韓國人笑，又以為睇緊《皆大歡喜》囉。係啦中間果個望落都有啲似家燕姐。 真係咁多年都冇乜點進步，無線啲嘢。 10/24/2009 搵食艱難 星期五晚想出街食飯真艱難。因為要去奧海城續大眾會員證，所以諗住去食埋飯，點知搵極都搵唔到地方。
想話就近求其去札幌拉麵食啦，又見有幾張空枱咁。本身間嘢冇人帶位，我正想入去自己坐，就有個侍應走埋黎好似想帶位咁。跟住佢去，佢竟然叫我地搭枱。同枱果對情侶都有啲側目，我明明仲見到有空枱竟然要搭枱，即刻轉身走唔使講嘢。
跟住沿路見到幾間都排隊排到出尖沙咀，於是去我地之前住大角咀嘅食堂風月強，點知都要等九張枱，又係即刻轉身走唔使講嘢。
菜生見最近麥狗買一送一，想話去食，我又唔想。提議去垃圾雞食啦，多位都暈，於是坐低食。
講完。
頭先菜生話我知原來老爺奶奶都有睇我個ＢＬＯＧ！以後要小心啲唔好寫衰佢地個仔。 10/18/2009 @NJ總結加照片
新屋
食物 龍蝦屋
行街
教會
中央公園 物質 @NJ-8 又係時候離開米國喇。
星期五一早，老爺奶奶就出咗去開工。我都好早醒，不過都係等老爺奶奶出去後先起身。同菜生一齊，繼續食粥，食埋前幾日同奶奶慶祝生日嘅蛋糕，我仲食左最後一雪糕，解決咗早餐。
十點幾老爺奶奶就返到屋企，大家HEA咗一陣，影左幾張全家福，就出發去機場。菜生渣車，沿途都冇乜特別，好順利。
去到機場，第一次CHECK IN唔使排隊，以為好少人好順暢啦，檢查行李果陣先大鑊，打幾層蛇餅。跟住比個唔知海關定乜老點去咗另一邊，話果邊好少人，點知一樣打蛇餅。有個黑妹喺度埋怨話本來喺另一邊已經差唔多到佢，點知比職員老點咗黎呢邊，仲要排耐咗。排到差唔多到我地喇，另一條隊個櫃台嘅職員竟然叫佢果條隊啲人龍走去我地個櫃台搞手續，痴痴地線。我後面幾個年輕洋妞即刻投訴，話佢做乜叫啲人排我地果邊，又催前面條懵炳move move move（因為佢由得隔離條隊啲人插過黎，又唔出聲又唔搶先走上櫃台，戇居居咁），最後都總算順利過關。雖然有少少波折，不過今次唔使比人大搜身，都算好好好好。
過完關時間尚早，就去咗食嘢。我叫咗意大利粉，雖然喺美國食意大利嘢都係傻傻地，但都及不上菜生最後一餐都要食中菜，啲西蘭花仲要黃嘅。差唔多時間登機，我地就去登機閘口啦，等咗一陣就登機喇，咁聽到空姐叫我地個行數就走埋去排隊啦，點知條隊唔郁喎，一大咋俄羅斯佬喺前面，狀似排隊但又紋風不動咁。咁我地見勢色唔對，於是就走上前啦，點知班友根本唔係我地班機嘅，唔知塞住我地個登機閘口把托。
上左機，今次有人坐我地隔籬喇。而且後面仲坐咗一家三口，一個洋妞阿媽帶住個八九歲靚仔同一兩歲靚妹，原本佢地唔係坐我地後面，但個阿媽話想照顧自己啲仔女，就同人調咗位，全家坐晒喺我地後面。本身以為洋人細路女見識廣啲，冇咁易喊，點知呢個靚妹真係改變晒我對洋細路嘅印象，全程十六個鐘，起碼有十個鐘喺度大喊或者大叫。不過我最近脾氣好咗，又冇乜感覺，因為坐成十五個幾鐘機，講真我自己都想大喊同大叫啦！要怪只怪個老母做乜鬼帶個咁細嘅靚妹坐長途機，希望各位已為人母或快將為人母嘅朋友引以為戒，去長途旅行果陣交個Ｂ去ＢＢ酒店或者ＳＰＣＢ暫託一陣最好。
另外仲有一個問題，咁大陸航空啲機呢，個個椅背都有個電視仔，其實係幾好，但係因為個電視係觸控式螢幕嘅，但個螢幕又幾遲鈍下，咁有啲人（例如我身後的細路，同埋我去美國果程後面個女人）就會超級大力咁篤落去，甚至不耐煩地每秒狂按幾十下，真係背脊都比佢篤穿。遇到呢啲情形我會好大力咁向後挨一下，以示不滿，都幾有效。
十五個零鐘返到香港，當然比美國濕夾熱啦。聽到機長報告話氣溫三十度，真係嚇鬼死，不過出到去又冇想像中咁熱，路上仲有啲風添。搭車返屋企時我眼瞓到爆，本來想返到屋企即時訓覺，但結果都係打咗陣機，睇埋魯魯修同鋼煉，寫埋ＢＬＯＧ先瞓。
至此成個０９ＮＪ之旅又圓滿結束。 10/16/2009 @NJ-7 終於黎到旅程最後一天，今日了埋啲未了心願。
今日都好晏起身，九點幾，等老爺奶奶出咗門就到我地，先去Costco，買咗啲調味料同即食意大利飯。然後去Target，買咗兩本書，仲有一支芥辣。跟住行咗陣（一兩分鐘）GAP，冇嘢睇。行完就會合老爺奶奶去DINER食飯，食咗牛扒。
食完飯去附近間BATH AND BODY WORK睇HANDCREAM，鬼咁貴，冇買，買咗啲嘢送比奶奶，自己又買咗幾舊香薰蠟燭，自用。因為買夠唔知幾多錢，送件嘢，揀咗青瓜味HAND CREAM。買完嘢返歸，休息，我打咗陣機。老爺奶奶冇幾耐返黎，比咗好多LOTION我，慳番唔使買。跟住佢地睇碟，菜生玩電腦我睇書。睇完碟奶奶煮飯，好好餸。食飯前老爺拎返啲陳年舊相比我地睇，睇到大頭怪菜，仲有各人嘅後生相。食完飯菜生將呢幾日影嘅相過落老爺部電腦度，又睇咗陣相。而家我好眼瞓，應該就瞓。
今日好大雨，落足成日，好在都係喺屋企附近玩，冇乜影響。當然唔落就更好啦。 10/15/2009 @NJ-6 今日其實係@DC先啱，因為今日去華盛頓。
菜生成日以為我想去，但係其實我係一年前想去，當時佢一手粉碎咗我嘅願望，今日想再補償已經太遲。不過我都姑且應酬下佢去一次，當去多個地方囉。
雖然今日要山長水遠去華府，但今朝亦都係咁多日黎最晏起身嘅一日，成九點幾先起身，搞呢搞路食粥化個粧又成十點半，跟住先出門。
去華府要成三個鐘車，中途去咗個休息站（唔記得係咪波爾的摩）休息下，食下嘢咁。因為太回味喺龍蝦屋飲果碗蟹湯，所以喺休息站都飲咗碗。雖然冇龍蝦屋咁好飲但係都唔錯，值得一讚。
去到華府已經成點幾兩點鐘，搵咗個剩係准泊到四點嘅街位，就先行去印第安人博物館食嘢。老爺奶奶推介話果度啲嘢食係印第安土著嘅食物，又平又好食咁話，於是去試下。啲嘢食係幾特別，不過又唔覺好平，我同菜生兩個都食咗成三百幾銀港紙，food court黎咋喎。食完嘢去咗博物館底層嘅gift shop睇下，啲鍊貴到傻。
食完午餐已經好晏下，得番半個鐘行太空博物館，結果剩係喺底層影下啲太空船，同埋行下gift shop就算，最後喺gift shop買咗兩本書，同埋拎咗大量應該係免費嘅介紹紙仔，幾得意，介紹返啲同件貨相關嘅知識咁，好鬼知性。我最鍾意拎呢啲免費嘅傻嘢，雖然唔知會唔會睇。
夠鐘去拎車，點知見到附近有啲位可以泊到六點半，於是轉移陣地，但係菜生又唔夠硬幣，我又覺得冇乜嘢好行，所以都係泊多半個鐘算。泊好車又返去印第安人博物館睇，今次由四樓巡到落樓下，其實我就覺得個館麻麻地，如果講印第安人生活，可以好似香港個文化博物館咁重現返佢地嘅實際生活環境，我諗會有趣啲。去到二樓又行Gift shop，呢間啲嘢平Ｄ喎，不過冇買，又係拎咗大量應該免費嘅介紹紙仔。行行下發現夠鐘，拿拿臨又去拎車。拎左車喺附近兜咗個圈，又返歸。
華府啲博物館最好嘅係唔收錢，好鬼正，希望香港果啲都效法下啦。可惜今次時間唔夠，而且又落雨，下次希望可以喺度住返一兩晚，慢慢行下，話晒首都嘛。
返歸途中菜生話部車要休息下，於是去咗個Perryville Outlet行。一去到我已經有啲不安，哇好鬼恐怖呢個outlet，人影稀疏到近乎冇，啲霓虹燈壞咗一半咁，又大半舖頭熄晒燈（有啲閂咗舖有啲執咗），好鬼得人驚啲氣氛。跟住菜生去咗佢最鍾意嘅Nike Outlet行，又比佢揀到對佢恨咗好耐又唔捨得買嘅波鞋，原價千幾銀港紙而家減到二百幾蚊，我都買左對鮮黃色波鞋。買完嘢，想話去廁所，但結果我驚得滯，都係決定唔去，猛咁催菜生走。喺個Outlet附近見到啲Motel，氣氛陰森，哇即時諗起德州電鋸殺人狂之類，真係好恐怖。
離開恐怖Outlet之後返屋企，食飯。今晚有大量長蟹腳（諗諗下菜生好似冇影相），我因為唔識剝食得較慢，老爺奶奶手勢則異常純熟。食完飯一齊睇《天水圍的日與夜》，老爺同菜生都覺得麻麻，我就好鍾意（但冇表露出黎），覺得佢啲細節好有心思又好值得人深思，戲冇明顯高潮但其實所有掙扎都喺人物內心，各自都有說不出的壓抑但生活照樣地過。同埋我好鍾意呢種成個故事冇奸角，唯一奸角就係命運嘅安排。最後講到大舅父靜靜向安仔提出可以供佢去外國讀書呢幕我都幾感動。始終要戰勝殘酷命運靠嘅都係人與人之間嘅情誼。對上一次令我有呢種感覺嘅戲（其實係電視劇）係木村同常盤貴子套《美麗人生》，最後葬禮一幕完全冇任何呼天搶地，連天氣都係極好，男主角形容女主角嘅骨灰好似沙灘嘅沙一樣細白。無論命運如何殘酷只要人照樣過活，不必做英雄打救全世界，其實就已經足以顯出人嘅堅強。 10/14/2009 @NJ-5 其實今日係@NY先啱，去咗紐約。
八點零起身，老爺之前一晚煲咗粥，今朝我又坐享其成。食完嘢拿拿臨就出發，交通暢順，約個零鐘車程就到紐約。去到搵停車場泊好車，然後搭地鐵先去中央公園。
去到中央公園，先食嘢，然後就去我最鍾意嘅動物園。中央公園個動物園其實幾細下，動物又唔係話好多，分熱帶雨林館、極地館、爬蟲館，仲有中間個海獅池。雖然地方唔大動物唔多，不過啲動物都幾活躍下。熱帶雨林館啲雀係咁飛，同埋人同雀嘅距離好好好近，一抬頭就會見到頭上樹枝有隻大雀，有時啲雀仲會跳去人附近。唔知咩館啲蝙蝠又係活潑，一大咋成幾十隻蝙蝠係咁狂飛，場面震撼。海獅池有兩隻海獅，一隻好懶咁喺石度曬太陽，另一隻就圍住個池猛咁游，表演咁。最最最得意係極地館啲企鵝，有啲喺岸上係咁拍翼，有啲就喺水度狂游，有時仲會跳上水面，姿勢優美。同埋呢個館有度好就係人同動物嘅距離好近，睇得好清楚。不過有度唔好就係啲館好臭，尤其爬蟲館臭到不堪，企鵝館又有好大陣腥味，都幾難忍受。
行完動物園出中央公園逛下。因為有好多馬車喺中央公園外圍行黎行去，所以周圍都有陣好強勁嘅馬屎味。所以如果要總結今日中央公園之行嘅感受，就只能用一個「臭」字概括。
離開中央公園就搭番地鐵去百老匯。因為應承咗個同事幫佢買啲Ｍ＆Ｍ精品，於是就去咗Ｍ＆Ｍ專門店。啲嘢好得意，但又幾鬼貴，不過有成三層，又好鬼好睇。除左紅色同黃色果兩隻Ｍ＆Ｍ公仔外，而家好興綠色果隻女仔公仔，自由神像都搵佢黎扮。不過我又唔多鍾意果隻野，可能同性相拒掛。
行完Ｍ＆Ｍ過咗隔離Hershey專門店，真係Hershey都開專門店使唔使呀。而且佢都學Ｍ＆Ｍ咁整左隻公仔喎，就係呢，大家都知Hershey果隻花塔餅形朱古力係點架啦，就喺佢上面加啲眼耳口鼻，搞掂。真係唔知搵邊個黎買。
行完又去搭地鐵，今次去蘇豪。不過因為時間關係，行得一間潮服店，跟住又行返去唐人街，買Ｄ電影電視影碟比老爺奶奶，然後就返歸。
返到屋企八點零，大家未肚餓住，於是一齊睇碟，睇咗《Laughing Gor之變節》，唔好睇。睇完同老爺奶奶一齊食飯，奶奶仲煲咗鮑魚雞湯，我又繼續坐享其成，係幫手拎下湯呀，裝下飯咁。食完飯好眼瞓，一陣打完BLOG我就瞓覺。 @NJ-4 講番星期一，哥倫布日，有啲人放假，有啲人又冇得放，好慘。
一早起身，搞呢搞路，唔知搞過乜，食過早餐，老爺奶奶出咗去，我就同菜生去搵放假的cream。
菜生先去Junction買橙，冇。於是去Cream記樓下，接Cream，去philly行咗一個鐘街，又拎咗報紙同買咗蛋糕預祝奶奶生日。然後去Weber食快餐，一人一個芝士漢堡，加一個薯條，各自一杯嘢飲。我飲咗朱古力奶昔，其實完全係雪糕黎，冇乜可能用飲管飲到，其實好早我就懷疑係咪唔應該用飲管飲，但又唔好意思出聲。呢間係Drive in嘢，所以要喺架車入面食，個盤掛咗喺隻窗度咁，險象環生。
食完嘢，去間寵物用品店睇下啲狗嘢。見到啲狗沖涼驚到震晒，又慘又得意。啲嘢貴貴地，冇乜嘢啱買，買咗一舊玩具比菜狗做手信。
跟住上Cream屋企，去下廁所，睇下結婚相簿，都唔錯幾好睇。啲房好大，廁所又大，間屋真係好好好大。坐咗一陣冇乜嘢做，我地於是返屋企。臨走確認佢冇賣到部ＷＩＩ，安心少少。
返到屋企，菜生訓覺，我費時打斷啲作息節奏，冇瞓，睇下第二日去紐約啲資料。時間過得好快，又夠鐘去搵cream食晚餐。於是又開車去佢屋企樓下，接佢同板去佢屋企對面食意大利嘢。
本來想食意大利飯，冇，於是食意大利麵。但係大家食包飲湯食頭盤（釀磨菇）都飽晒，啲巨型麵食黎咗之後每人食得十零條又飽晒，唯有包起拎返屋企。
食完飯去行商場，其間我想去廁所，於是跟商場啲指示牌行，點知原來個廁所好鬼遠，行到我身水身汗，點知返去搵菜生佢地時，先見到原來有另一個廁所喺好近，ＤＫＬＭ。之後菜生話Cream嫂問我係咪悶，唔係，不過我唔鍾意講嘢啫。如果我悶我就會覺得好嬲，會拍晒枱走，到時大家都一定唔會悶。
同場加映番我嘅表情解讀，方便番大家。其實我通常都冇乜開心唔開心，悶唔悶，好心如止水下。但係如果嬲就會好嬲囉，方圓廿里以內嘅人都一定會知。
食完飯返歸，老爺奶奶食緊飯，因為大家都好飽所以食唔到蛋糕，沖個涼搞呢搞路然後又訓覺。 10/12/2009 @NJ-3 雖然只係第三日，但係好似黎咗好耐咁，唔知點解。
今朝大約六點起身，呢幾日啲作息時間幾好，早睡早起，返香港都保持到就好。起身食嘢，食咗龍蝦沙律、壽司，仲有必不可少嘅每日一雪糕。食完hea陣，老爺奶奶起身又煲咗粥同整咗糉，仲有油炸鬼，又食一餐。跟住沖涼。
食完去outlet，去JERSEY SHORE OUTLET，本身想買份生日禮物比奶奶，但冇野啱，我又唔想買嘢，冇錢，所以hea行，行左冇幾耐就嗌肚餓，去咗food court食薯條熱狗。今日好多人，呢度尤其多唐人，倍感親切。食完嘢老爺奶奶過到黎，佢地已經買咗嘢，於是一齊走。
返到屋企休息一陣，就返教會。老爺奶奶仲入咗詩班，熱心教會事務，所以要早啲返去練詩。我同菜生喺教會外面遊蕩咗一陣，因為秋天開始有啲落葉，啲鋪頭又好多閂咗門，所以望落感覺蕭瑟。見到有間雪糕店，喺戶外擺啲桌椅，直頭成個荒蕪花園咁。行咗一陣又夠鐘，返教會崇拜。
教會得好好好好少人，但個教堂又好大，對比強烈。唱台灣讚美之泉歌，好聽。中間突然有兒童時間，叫班細路出黎唔知做乜。啲細路好似好唔願意咁，同埋佢地同個外籍主日學老師全程英文對答，唔識國語，令人唏噓。跟住講道，講得極深入，講晒聖經歷史咁，香港唔會有，有都冇人會返。不過我呢個香港人當然覺悶，頻頻睇錶。結果成個崇拜超時完成。
崇拜完有愛筵，有野食。啲嘢幾好食，大家又傾下偈咁，都幾好。
食完都八點，又返歸。雖然今朝沖咗涼，但因為唔想第二朝先沖，所以又沖，乾淨過平時。跟住老公執佢自己啲嘢，我打機，又一天。 10/11/2009 @NJ-2 今朝五點零起身，菜生同我一齊起，食左尋晚老爺奶奶買番黎嘅壽司同三文魚刺身做早餐，然後hea左幾個鐘。等老爺奶奶出門後，我地菜生就行左去附近嘅百視達睇下有冇戲好睇，然後又去shoprite行。喺果度都見到一啲想買嘅嘢，最後買左一盒雪糕筒同一本雜誌，冒雨返歸。
返黎就煮lunch，等老爺奶奶返黎食。咁我剩係負責蒸水蛋，菜生負責煮菜、煲飯同蒸魚，但最後條魚都係等奶奶返黎先蒸。食完飯又要即刻出發，去Cape May間Lobster House再食過。
今日龍蝦屋唔係好多人，所以幾舒服。我地先食左生蠔同生蜆，食左蟹湯，好味。跟住仲每人食左半隻大龍蝦，其實食到呢度大家都頗飽，但老爺又去買左個boiled seafood combo之類，又帶子又魚又釀青口又crabcake又蝦，仲有多個薯仔，飽到傻。臨走意猶未盡佢又買左龍蝦沙律同龍蝦湯返歸。
個零鐘頭車程後又返到屋企。眼訓，寫Blog，洗面，瞓。 @NJ-1 10月8日晨早十點幾機，七點零出門，因為菜狗暫託咗喺SPCA，所以冇狗送出門。帶左頗少行李，個喼裝得一半都冇，應該好輕。
喺機場大家樂食咗個早餐，去免稅店買咗嘢，喺登機閘口等咗冇耐就上機，時間剛剛好。
上到機，座位附近有好多騎呢人。首先係有對五六十歲夫婦唔知有心定無意坐錯位（原本坐中間坐錯喺窗口），跟住果兩個位嘅主人叫佢地坐番自己位，果對夫婦竟提出要同佢地換位，人地當然唔肯。跟住喺旅程當中就發覺果對夫婦應該唔係幾識英文，但係又多多要求，一陣又話唔要預訂果個餐，一陣又嫌個麵包硬咁，屬比較麻煩的一類。
跟住我地個位隔一條巷嘅右邊，就坐咗個艷女，應該二十頭，著黑色背心黑色熱褲，化晒裝，一上到機就不停講電話，講到本身坐佢隔籬嘅一對男女都買佢怕，自動調咗位。講到機長叫人熄電話佢都唔捨得熄，差啲勞動到菜生向空服員投訴。全程機大部分時間佢都好嘆咁瞓晒喺成排位度，空姐叫佢綁安全帶都好少理，有時難得坐起身，又棟高晒隻大脾咁，春色無邊。好在菜生坐喺我嘅另一邊，見唔到呢番景象。見佢咁豪邁嘅性格仲以為佢係bamboo rise，空姐都以為係，問佢係咪公民，佢又話係遊客，可能係加拿大bamboo。落機前三個半鐘佢就已經喺度補妝，所以話真係呢個世界勤力的女人最美麗。
另外一個發現係美國啲空姐真係特別惡死。第一宗惡死事件就係斟水事件。話說我同菜生坐飛機中間果排椅，咁菜生坐左邊，我坐中間，右邊個位冇人。咁派嘢飲果時，右邊嘅空姐（約五十幾，香港人黎）比完嘢飲我，就順手問埋菜生要乜。咁菜生拎咗嘢飲，左邊架車仔先到，個空姐（肥，三十尾四十頭，台灣人）問菜生要乜，菜生話有，個空姐就不斷「質問」（無誇張）菜生杯嘢喺邊度黎，菜生話係右邊個空姐比佢，跟住佢竟然「教訓」（無誇張）菜生話下次應該等佢比，真係痴鬼線，一來係香港空姐主動問菜生要乜，二來要杯水都唔得，集中營咩。
第二宗惡死事件同之前講過果對略帶麻煩嘅夫婦有關。咁對夫婦本身係預訂咗啲特別餐（應該係低糖餐），咁可能搭長途機太辛苦，後期佢就要求空姐（台灣果個）取消之後果幾餐，咁個台灣空姐都ＯＫ咗。但到派餐果陣，個香港空姐又照派嘢比佢地食，咁佢地就話話左唔要喇乜乜乜咁，個空姐就好似阿媽咁話佢地：「我地公司幫你訂咗個餐，你地而家話唔要，好嘥錢架喎！要啦！」於是對夫婦就好可憐咁勉強食左個餐。
今次程飛機全程十五個鐘多啲，我今次帶咗好多大學校友會同埋宣明會呀、失明人協進會果Ｄ免費會刊上機睇，幾好喎又，呢啲平時成日寄黎都冇時間睇，咁樣一次過睇完掉喺飛機度就得，都唔錯，ＯＫ好睇。最好睇嘅環節竟然係中大校刊入面講校友動向果部分，又有潘蔚林（就係話佢報道颱風消息受觀眾歡迎），又有王晶，呢啲名人固然好睇，但有啲奇怪消息都好搞笑，例如有個新畢業嘅ＢＢＡ學生，話佢因為金融海嘯搵極都搵唔到工，後來終於搵到份郊野公園顧客服務員咁，真係唔知登出黎做乜。然後又有人寫左首詩勉勵香港人喺金融海嘯中逆境自強，同埋有大量某某校友出新書嘅「消息」，我諗呢個環節應該都係Ｄ人自己寄上去登，好過賣廣告。
呢程飛機頭六個鐘都ＯＫ，之後大半時間都幾難捱下。不過今次冇睇幾多戲，係睇左一套講動物嘅短片，睇左Matrix1（唔錯）、2（唔掂），仲有四眼雞丁（Chicken Little，條魚好笑）。其實都幾多新戲，我地啱啱喺戲院睇完嘅Star Trek都有，又有二十世紀少年二，不過我都冇乜點睇，一黎啲英文新戲冇中文字幕，二黎啲續集電影，我根本冇睇過第一集，所以唯有睇番啲舊野，例如Matrix123都有齊字幕，我又冇睇過，正晒。
好辛苦捱完十幾個鐘機，去到機場過關好鬼多人，啲關員手腳又慢，所以搞咗極耐。之前提到果對老夫婦今次又發揮香港人逆境自強同積極進取嘅精神，佢地本來排喺我地左邊果一行，我地右邊個counter本來係冇關員嘅，但後來黎咗一個關員，喺右邊個counter搞黎搞去咁，好似想開工，個老婆就一馬當先即刻排定喺果度先，個老公都好似有少少尷尬咁叫佢返黎先啦，都未開始，乜乜乜，但個老婆借咗聾耳陳隻耳，好堅毅咁繼續等，雖然都等左一段時間，但都終於比佢等到，仲早過我地過關添，頂。
然後到我地過關喇，咁都好順利，反而我地左邊個counter就搞左好耐。事緣果陣係一對台灣父女喺度過緊關，咁個黑人關員猛問佢地台灣係咪即係中國，咁個老豆就話唔係呀，係台灣呀，中國係中華人民共和國呀咁，咁個關員又答話係囉，台灣係中國一個省（state）丫嘛，跟住個台灣老豆就笑住話not yet，如是者相同內容嘅對話重複咗幾次，個關員依然係搞唔清楚。連幫我地搞緊果個關員聽到都皺晒眉咁搖搖頭，搖左好幾次，笑死。
過完關，順利拎咗行李，一出到去就見到老爺奶奶。老公渣車，返屋企後都四五點，老爺奶奶又要去開工，我沖完個涼訓覺，訓到第二朝五點先起身。 10/8/2009 轉行夢 發夢攰過擔泥。唔知係咪發夢要動用好多腦電波之類！總之發完夢真係辛苦到ＰＫ，起唔到身咁滯。
尋晚發左兩個夢，一個關於大學同學（就係上星期上過我屋企同一齊食飯果班），一個關於個舊同事。
第一個夢入面，唔知點解成班人喺架校巴度，跟住其中一個舊同學ＳＯＳＯ負責渣校巴。不過唔係長渣嘅，係做替工好似。應該係個校巴司機臨時有事所以叫佢渣掛。校巴上都有啲細路好似。唔係太記得有冇發生過生死時速事件，好似有掛，又好似經過好運中心樓下，好似。
第二個夢記得多Ｄ。話說舊同事雅典娜唔知點解同我一齊住，大家好似住宿舍咁。咁有一晚我好緊張咁等佢放工返黎，有啲嘢想問佢。原來佢轉工去咗補習社做（現實中佢做商業公司ＡＤＭＩＮ），咁我又想想地搵份補習工，於是係咁問佢喺補習社做果啲嘢，問下係咪學生越多就可以抽越多佣之類。印象中佢喺夢入面因為初初入去做，都唔算賺好多錢但都幾多，而且好有潛質做到補習天王。會發呢個夢應該係因為以前做同事果陣佢成日同我講佢幫個細路補習果啲嘢。
因為今朝要開工所以咁晏先寫，都唔係太記得個夢嘅細節，可能有不少再創作的成份，亦未可知。 |
|
|
