| W.W.'s profileWW @ 30sPhotosBlogLists |  Tools  Help |
|
|
11/20/2009 突然又諗起一個故事 唔關我事，聽番黎，可能係啲都市傳說之類，同「幫朕check下」一樣。
從前有一個人，打兩份工，兩間公司就喺一座大廈嘅上下兩層。咁佢有時去上面，有時去下面，做左好耐（唔記得幾耐，不過好似唔夠一年，五六個月掛）都冇人發覺，就係咁一直逗兩份人工。
後尾唔知點（真係唔記得點）比人發現，兩份工冇晒。
咁我今日諗起呢個故事，就猛咁諗有冇可能做到。
以我以前做編輯為例，因為大部分時間都係自己喺張枱度默默耕耘，所以都不無可能。雖然我上司都會成日問呢問路，但只要我喺果間公司時喺佢面泣泣揚揚多啲，應該ＯＫ。
唯一問題係開會。我以前公司開會開親都最少開一晝甚至兩晝甚至ＯＴ，咁嘅時候可能要向另一間公司請假。而我地一星期又最少開一次會（所以果陣成日覺得好煩，因為好多嘢做，但開會冇乜生產力，大家都冇乜準備，一齊坐埋先黎睇啲外版書，睇下邊本值得買版權咁，或者剩係講下其他部門嘅是非咁），真係要作到自己有長期病患先請到咁多假。
其實如果真係做得黎又幾好。我成日覺得返office好嘥時間，一日平均得六成時間係集中到做嘢，其餘時間都係心神恍惚，想做自己嘢又唔得。如果可以不時轉換下工作環境（再加上可以逗兩份人工），工作起黎應該起勁啲。我諗。 11/19/2009 完美的一天 今日真係好完美嘅一日。首先唔好講我幾點起身先，我驚大家會妒忌。晏晝食完飯就做嘢，本來想做完一舊，但係又做唔晒，不過唔趕住交所以算。夜晚返學，途中喺地鐵站教左個自由人增值八達通（佢係咁隊張廿蚊紙入部機度）。今日上科技翻譯，阿ＳＩＲ一如既往比好多堂課。我隔離個同學貝蒂終於開齋比阿ＳＩＲ叫答問題。阿ＳＩＲ可能鍾意我個名堂堂都叫我，今堂都唔例外。不過今日比阿ＳＩＲ讚我答得VERY GOOD，真係好少可。阿ＳＩＲ今日好多野講，心情好好，成日講笑。唔知點解我次次星期一上完堂都頭痛，星期四又冇事。放學有個大驚喜，老公山長水遠黎接我，話係秉承老爺教導，老婆係愛黎錫嘅，多謝晒。返到屋企有白灼蝦食，又飲左杯暖笠笠香濃朱古力（KIKI唔使驚，唔係你幫我買果Ｄ），好舒暢。
聽日全日喺屋企，不過好多野做，希望做晒啲野舒舒服服過周末。 直播打機最近發現一個網站，啲人可以直播自己喺電腦做緊乜。有個台灣人直播自己打機情況，真係令本人萬分感動呀～～好一個對武俠ＲＰＧ有大愛的人啊～～～我幾乎次次上親網都會上去望下，無論早、午、晚、深夜，佢都係打緊機，學同工自然都唔使返，直頭飯都唔使食咁。我只係睇左短短幾日，已經見佢爆左三個ＧＡＭＥ，打緊第四個，真係令人慚愧萬分呀！！！好想效法呀！！！！ 因為係直播佢部電腦做緊乜，所以時不時都會見到佢上網搵攻略。例如下圖果個音樂地板就搞左佢好耐（而家仲未搞掂），可見呢位大俠並非打機勝手。講起上黎呢個ＧＡＭＥ其實我都玩緊未爆，因為我有個非常唔好嘅習慣，就係打機打到就爆果時會ＤＵＭ波鐘，唔捨得佢完，所以好多ＧＡＭＥ都係玩到最後，玩唔爆。 http://zh-tw.justin.tv/nagisa36605
另外尋日見到有人直播自己玩school days，想當年呢個ＧＡＭＥ嘅賣點係全動畫Ｈ－ＧＡＭＥ，但尋日我睇左一陣，發覺啲動畫真係好流下囉，基本上剩係得啲換鏡同個嘴喺度郁，以「動」畫黎講都好唔動下，啲公仔又唔靚，好在當年冇嘥時間玩啫。不過可能Ｈ場面好動都唔定，咁我又唔知啦。 11/18/2009 突然想分享一件舊事 從前，我參加過一個團體。咁個團體每個星期都有聚會。
有一次，個團體搞左個歌唱比賽，咁有幾個人因為同我唱過Ｋ，覺得我都唱得兩嘴，暗地裏想我做代表參加，但係又冇直接同我講。
咁有一次聚會，大家一班人唱歌咁（講到呢度應該全世界都知果個係咩團體），突然叫我獨唱一段。咁我細個年少無知都幾順得人，冇而家咁串，咁唱咪唱囉。
聚會完左，果個團體嘅領導人就同我講，叫我參加呢個歌唱比賽，頭先叫我獨唱係想測試下我有冇咁嘅能力。
我二話不說即刻推左，堅決拒絕。我覺得佢地咁好唔尊重人，我根本冇主動要求過參加比賽，如果你好地地問我想唔想，我都可以考慮。而家你請我去參加仲要粒聲唔出走黎試我，我真係火都黎（雖然我細個年少無知，不過都已經幾好火）。
咁最後佢當然係搵唔到人參加比賽啦，抵佢死。
其實呢個世界真係乜野人都有。有我呢啲咁狼戾、ＥＱ咁低嘅人，又有啲好鍾意judge人嘅人。
頭先上網睇討論區，有個狗主話帶隻著晒冷衫雪褸嘅芝娃娃落街散步，比個女人指住黎鬧，話佢咁凍仲帶狗散步係虐畜，仲同隻狗講「仔仔你快啲叫媽咪帶你番上去啦」。
咁我咪覆話「香港好多癲佬」（大意），我一直都覺得係。
不過諗深一層，我覺得人癲，人地見我咁躁狂咪又覺得我癲。
結論係：其實人人都係癲嘅。 11/16/2009 PK日 呢兩日都算少少戰勝咗被窩，做晒想做或應該做嘅嘢。
星期六，一早返工，放工返黎執埋個JOB啲手尾，跟住好似訓左陣，訓到溫溫燉燉之時竟然夠鐘出去做織嘢義工。都幾唔想去因為個被竇暖笠笠。掙扎左一陣終於都係出左去。呢次織嘢比我嘅感覺係：啲女人真係好多嘢講。不過啲義工都好勁，好多織一個星期已經織好一條頸巾。其實本身我都得嘅不過我拎唔夠冷啫，車。
今次又提早走，返沙浸崇拜。今日唱啲歌我好鍾意，個講者都講得好好不過唔夠時間比佢發揮，都幾可惜。離場時又見CHRISTMAS，終於聽到佢講下近況。各散東西後我地返美孚食飯，經過吉野家好多人，想去椰林閣竟然好似去左酒樓咁要叫號碼，大角咀果間椰記從來冇試過囉。我地兩公婆梗係唔會同你等啦，結果去左平台一間叫紅番茄嘅野食。冇人嘅間嘢，我同菜生都食左雜扒餐，啲扒好勁鬆肉粉口感，同第尾牛扒差唔多，甜品竟然係半舊罐頭桃，啫喱都費事整，真係未見過咁懶嘅餐廳。
食飽飯返屋企狂睇上星期宮心計，睇睇下又覺得幾鬼好睇，楊怡做得幾好喎又，奸得黎又真係會覺得都係其他人衰佢先要報復，我幾buy佢。跟住睇魯魯修大結局，睇埋鋼煉，瞓得。
星期日一早都幾凍，所以個被竇暖笠笠真係舒服都極點。好想唔去返主日學，不過都係驚驚地被神擊殺，所以都係返。但係因為有過猶疑，所以都係俾神懲罰左，臨去到教會門前，竟然喺樓梯ＰＫ。其實都冇乜竟然，因為我同我阿媽都係成日ＰＫ之人，年中Ｐ埋唔少Ｋ，我尤其鍾意碌落樓梯，對我黎講條條皆是ＰＫ梯（不過如果真係喺中大果條ＰＫ梯碌落去，我死硬）。不過今次算幾好，只係仆左幾步，刮損啲手腳，冇屈親冇剩。
食完通粉瞓覺，好瞓到。跟住又係掙扎左一陣，先起到身去做FACIAL。做完FACIAL返屋企，咁尋日追完宮心計，今日當然要追埋富貴門啦。呢套麻麻，不過我會堅持落去。
夜晚食飯就精彩咯，老公竟然整左薑蔥煎蠔，仲有蒜心炒肉片，仲有芥蘭。老公煮飯好少一次過煮兩個大餸，值得讚賞。啲蠔都好新鮮，非常好味。蒜心又夠甜，肉片又夠淋，呢排成日出街食飯或買飯食，好耐冇食過呢啲好嘢。
食完飯我繼續追富貴門。追完劇挑起條筋想做嘢，本身諗住星期日安息日要安息，但係又忍唔住想開工，因為唔想聽日咁忙，又要學琴又要上堂又要做嘢。結果做完後日要交嘅JOB，SEND埋，老公開夜未返，我又唔想訓住，開套瘋狂卡通《銀魂》黎睇先。 11/13/2009 菜狗ON9系列今日，一起身，屋企有被搜掠痕跡。
同上次麵包同糖糖事件一樣，行多幾步又有發現。
連環殺手每次喺同一個地方犯案。
受害者傷勢嚴重，個身穿晒。
睇真啲受害者張車頭相。
菜狗親身演繹何謂「ON9無極限」，handcream都食，話佢唔係傻都冇人信。 今次事件足以證明bath and body works產品香味幾可亂真（我要收埋支朱古力味body cream先得），但食味方面有待加強，因為佢應該係咬穿左之後LAM左一下就冇再食。因為支野冇乜少到。 而家啲cream可以喺啲牙窿度直接擠出黎，好方便，蓋都唔使開。但係支野出面有菜狗啲臭口水味，世事冇完美。 11/9/2009 又講洗衫先 忍唔住，不過唔關人事，自己懷緬過去啫。
喺我嘅人生黎講，最光輝嘅洗衫日子應該係住禾輋邨果時。因為禾輋邨係果Ｄ有天井嘅公屋，而且屋企又有個好通風嘅騎樓，所以洗完啲衫既可以晾喺騎樓，又可以晾出欄杆，有太陽直曬，晾完啲衫真係暖笠笠，有陽光香味。
最初屋企好似冇洗衣機，定係有但係我阿嫲唔識用，所以都係佢用手洗。沖涼又係果個盆洗衫又係果個盆。後尾阿媽會用洗衣機洗，個洗衣機係開蓋嘅，洗衫時會睇到機入面啲漩渦，會見到啲水變灰色，有時會伸隻手入去玩下，掹番起隻手時會聞到啲污水臭味，真係好玩唔玩。
後尾搬左去私人樓，冇地方晾衫，阿媽會晾喺佢自己間房，因為佢間房嘅天花有條鐵柱，原本係用黎將間房分開兩邊。但果條鐵柱都唔係幾夠用，有時佢會晾喺啲書櫃度，總之掛到衣架嘅地方都晾。以前禾輋部洗衣機我都識用，後尾呢部反而就唔識，完全冇掂過。另外因為啲衫晾喺室內，所以好多時會晾到啲衫好臭，因為ＵＰ住啲衫滋生細菌嘅關係。
喺大角咀住果時屋企太細，冇位擺洗衣機，所以啲衫拎出去洗，一次大概廿幾蚊，大約兩個星期一次，無憂無慮。
住左美孚，租屋連埋洗衣機，用得唔好嘥，所以開始洗番衫。最初晾喺廁所，但後尾啲衫又開始ＵＰ出臭味，同埋有時啲衫晾成個星期都唔乾，頂唔順，買左部有乾衣功能嘅抽濕機。因為個書房冇乜用（我係work in bed嘅），所以就用書房晾衫（因為抽濕機需要喺密閉空間用）。但一次都要抽幾耐下，內衣褲比較快乾，通常一日搞掂，面衫果啲就最少兩日。而床單果啲比較大型嘅物件都係要拎比人洗。
將來希望一係有乾衣機，一係有天台或夠大嘅露台比我晾衫，呢個係我人生最終極嘅願望。 菜狗與冷 Post 埋喺度等老爺奶奶都睇到。
11/7/2009 忙到冇朋友今日，一早去返工。因為節目調動關係，而家每星期只返一日，時間好使好多。
放工後買麥９黑椒漢堡食，唔夠汁。發現商場開左間椰林閣，細查之下原來開喺ＢＡＢＹ ＢＬＵＥ個位，ＢＡＢＹ ＢＬＵＥ執左！！！食完麥９休息左一陣又出發，又去理大護眼覆診。因為之前個視光師話我眼角膜損左，覆左幾次診都未好（免費嘅，所以唔係DUM症），好在今次冇事。但今次驗近視又話我右眼比上次深左廿五度，散光就兩邊各淺五十度。
睇完眼過海去西灣河做義工，織頸巾。
本身CHRISTMAS都話報左名做義工嘅，點知晏晝又唔見佢。本身個活動五點半完，但提早五點走，因為想返沙浸崇拜。
又拎到月刊，巧開針仔。喺教會反而見到CHRISTMAS！與此同時今日講道講朋友！唔知係咪神有咩啟示！散會時想同佢傾幾句，點知佢係咁BYE BYE我地，被朋友仔遺棄了！很慘仔！收拾心情後過禾輋商場搵飯食，本來菜生點名唔想去五十嵐，但見佢個六十幾蚊任食火鍋好抵，又去幫襯。叫左個豬骨湯底好鬼鹹，啲野食麻麻。最好食係黑豚肉。最唔好食係附送果個天婦羅，真係做左三十年人都未食過咁淋嘅天婦羅，好似炸唔透咁。
食食下好眼瞓，但堅持去埋蛋糕店買蛋糕仔先返屋企。買左一舊士多啤梨蛋糕，同菜生分。啲士多啤梨都難得唔太酸，但啲忌廉有少少怪味，五分滿分只值二點五分。
返屋企又見傻仔。上星期四沖完涼，仲尚算乾淨。
雖然好眼瞓但都要睇埋魯魯修同鋼煉先訓。 人妻的責任各位新婚人士不妨一齊交流下。 對我黎講做人妻嘅責任比較係精神上多於實務上。例如多啲同老公傾偈呀，聽下佢講爛ＧＡＧ呀，支持下佢做傻事呀，互相學習互相勉勵呀，拓闊彼此嘅眼光呀，娛樂大家呀，作發洩對象呀，有更多精神（同肉體）交流呀，諸如此類。洗衫煮飯等家務事我睇得好開，有時間就做冇時間就遲Ｄ做。好在我老公都（好似）睇得好開，所以大家喺呢方面都冇乜性格不合。 因為從小接受嘅家庭教育（就係冇乜教育）關係，我不嬲對一個屋企有乜嘢需要冇乜概念。細個我阿嫲餐餐都係午餐肉、豆豉鯪魚、咸蛋、皮蛋、南乳或者豬肉蒸豬肉（總之所有可以放入電飯煲蒸或者一開即食嘅嘢）任擇其一，所以我對屋企飯冇乜留戀（雖然都食到我肥屍大隻），對食物嘅食味同營養等近乎冇要求。嫁咗之後我偶爾都會煮下飯，但基於經濟原則（我每次買餸都買得好豪，買隻蛋都買得貴過人，我煮一餐可以出街食一個禮拜），所以我好少日日煮。難得我老公（自稱）鍾意煮嘢，又煮得好食，我自然樂於讓出廚房。 家居清潔方面，都係由於細個嘅家庭教育，所以要求甚寬。不過我成日覺得一個人家居太乾淨對身體唔係幾好。成日見果啲過敏症小孩多數都係有錢仔，屋企工人一日打掃四次咁。我而家身體咁好（自認），我覺得都係因為細個屋企夠污糟。所以我成日都同菜生講，第時生左仔要放佢喺垃圾場或公廁生活一排，係有其理論（？）基礎的。不過而家養左狗，唔想菜狗由白變灰再變黑，所以我都「諗住」吸多啲塵抹多啲地。 洗衫方面，我以前屋企係日日洗嘅，因為人多。而家一星期一次，因為衫多。洗得太密著黎著去都果幾件衫，洗疏啲可以著盡啲啲衫（ＯＫ我認呢個理由係我啱啱諗到嘅）。同埋我在家工作，衫都唔使著咁滯，一星期都冇兩件衫要洗；我老公啲底褲仲多過百貨公司內衣部，所以一定唔會一條底褲底面加側邊著四日，唔使擔心。同埋衫污糟左就係污糟左，擺多個禮拜佢都係污糟，咁如果擺耐啲會再污糟啲，一洗乾淨晒仲抵添。 唔做家務嘅另一個潛意識原因，係因為唔知幾時聽過人講（好似係黃淑儀講），你日日煮飯比老公食，老公唔會珍惜，之類。當然呢個只係一個迷思，男人衰起上黎你日日煮飯佢可以話你黃面婆，你唔煮飯佢又可以話你唔顧家。不過呢種觀念對我都不無影響。未至於話會特登因為要「吊住個老公條癮」而唔做家務，但始終唔覺得呢樣野係咁重要。總之都係抱持住「自己想做嘅時候就去做，無謂勉強，抹少日地唔會死」嘅原則做人。 總括黎講其實我結左婚同未結婚對家務嘅態度冇乜分別。我諗可以保持住自己個性同價值觀「五十年不變」，呢個都係我選擇嫁比菜生嘅一個原因。 11/6/2009 似是故人來 今日上科技翻譯，好難，學完又冇用（因為要真係識果啲專門科技嘅人先做到科技翻譯，我呢Ｄ文科人只能收皮），唔想讀。不過呢啲都係題外話。
個個喺ＢＬＯＧ都講同事，等我講下同學。同事下次有機會先品評。其實上次上第一堂我都有所發現，但今日更肯定。首先係有一個同學係我以前公司一個編輯，因為我而家都有幫果間公司譯嘢，所以都算同事，同埋之前都喺另一個同事屋企見過一面。但因為呢個同學兼同事都幾ＣＯＯＬ下，所以我冇同佢打招呼，但我諗佢應該識我嘅，唔記得樣都記得名。真係大鑊，一陣比佢發現原來我啲翻譯水平咁低（例如今日阿ＳＩＲ問我問題又唔識答），直接影響本人的事業錢途。
另外一位同學就係名人。我第一眼見佢已經認得佢上過電視，做過《窮富翁大作戰》，今日有個同學問佢做邊行，佢話做電腦，就進一步印證我嘅假設。所以幾時都話報呢啲COURSE嘅人，一係就傻人（如我），一係就有錢人（如佢）。上述果個擺到明係大老闆唔在講，第一堂我同另一個同學講起，話如果報翻譯碩士好貴，成八萬蚊，佢竟然話都唔係好貴啫，咁耐都冇乜點加過，好多人都報左，聽到我眼都突埋。我覺得八萬蚊好貴呀，我寧願執行八萬個小時社會服務令呀真係。
果個話咁耐碩士學費都冇乜點加過嘅同學仔叫貝蒂，係我喺呢個COURSE新識嘅同學仔。識到同學仔真係巧開針，大家做堂課時唔識都可以商量下。雖然都好想好似中學咁同埋同學仔一齊放學，不過一係就佢一支箭咁標左去（上次），一係就我一支箭咁標左去（今次），冇得重拾校園情懷。同埋我覺得佢有少少似放左工好攰唔想同人應酬咁多咁，所以都費事煩住佢。
大致係咁，其他人唔識。根據上次經驗應該畢業都唔會識，就係咁。 11/3/2009 寫下最近啦不如 其實就冇乜特別，不過今日突然覺得呢種日子就係最幸福嘅日子了，好似係幸福到盡，我都想像唔到更幸福係點樣，所以十年後唔知會點？會保持呢種狀態十年？定係會滑落？定原來仲有更幸福嘅狀態？
上星期六應查理伉儷之邀去左屯門劉星花園ＢＢＱ。而家啲人唔興去郊野公園透爐ＢＢＱ了，都去啲ＢＢＱ場一條龍搞掂。年初時同３ＤＤＢ佢地去大尾篤，都仲叫係自己透爐，今次去屯門，就直情爐都幫你透埋。今次天氣又係好好，好夠涼，上次去大尾篤都有啲熱，今次天氣就好PERFECT，啲嘢都幾好食，最好就係喺正個洗手盆隔籬，可見劉星（可能係青爺啲鄉里）都係個好細心嘅人。順便記下果日啲ＢＢＱ友嘅名先：ＩＤ精英晶晶、小學精英MAGGIE同SHIPPING精英KATHY，記得晒架幾勁。
尋日開始又學翻譯，但係未收到持續進修基金覆我，都唔知有冇得Claim番錢。第一階段先上文學翻譯同科技翻譯，跟住係財經翻譯同傳媒翻譯，最後法律翻譯。教文學翻譯個阿SIR有啲神化，成日跳跳紮咁，講嘢好快，聽到我尋晚好頭痛。不過佢尋日有樣嘢講得幾好，就係「翻譯一定有翻譯腔」，同埋翻譯係為咗將外來事物引進，所以係應該喺縮窄兩地差距之餘盡量保持原文。同埋叫我地唔好用咁多成語囉。細細個背埋咁多原來冇用，真係好大打擊。
日文繼續堂堂默書，隔堂小測。Miss都教得幾好，同埋雖然咁講有啲唔好意思不過我幾鍾意呢個Miss嘅身材 XDDDD 有肉地得黎唔肥（我覺得，但係以港女標準可能又唔同講法），好似好好攬咁（希望佢唔會見到呢段形容，如果佢見到我要補充一句我結左婚喇，你唔使驚）。同埋個Miss有時又會講啲cutie嘢，做啲cutie動作，但因為佢個樣穩重得黎都帶點cutie，所以又唔會覺得好肉麻。所以話識日文真係人都cutie啲，值得一學。
古琴停左幾星期（因為去米國同重陽節）終於復課。彈得麻麻，機械聲咁，所以老師上堂就教我點樣將啲感情貫注落啲音樂度。咁我當然係唔明啦，佢亦都繼續係唔知點解釋比我聽。所以都係隨遇而安啦。
工作方面都係咁，啱啱又接左舊筍嘢，又可以幫補下。其實而家嘅工作量係算適中，生活得好舒服，又有時間溫下書，不過自己又隱隱有啲不安因為硬係覺得賺唔夠，同埋獨沽一味剩係幫一間公司做又覺得唔穩陣，但係你話搵多份又好似忙得滯，冇得享受下人生，所以雖然都見到啲兼職招聘廣告幾啱做但係始終猶疑。不知點算好。
菜狗方面前幾日咬左菜生一啖。事緣菜生份人好煩，呢樣嘢人盡皆知。佢成日都自以為係同菜狗玩緊，但其實係煩緊佢。前幾日佢又煩住菜狗，菜狗已經輕輕咬左佢一下示警，然後匿埋入梳化底，但係菜生仲唔死心兼且好蠢地伸隻手入去想捉佢出黎，於是菜狗就動真格的咬左菜生手指一野，咬到流晒血。雖然係好抵死但係我都驚佢會感染到啲咩細菌之類，不過過左幾日冇事應該冇事掛。
屋企方面冇乜嘢，呼應番阿板一星期洗三四次衫嘅宣言，我希望我屋企一星期可以洗一機衫，今個星期洗底衫下個星期洗面衫咁，唔好用咁多水咁多電，為環保出一分力。
心情方面本來秋天我就應該好好心情，但係呢幾日因為朋友屋企出左事所以我都唔係幾開心，好嬲怒。但我都幫唔到乜嘢手，只可以喺禱告上記念。希望佢嘅問題可以快啲解決，同埋希望世上嘅衰人快Ｄ死晒佢。另外自己娘家賣緊樓，但係而家個個唱淡樓市，未必賣得出，又未必賣到好價。我阿媽有時都幾黑仔。 10/30/2009 頭暈暈，發夢上深圳 尋晚個頭突然好暈，又嘔咗成晚。
傍晚開始暈暈地，菜生返黎後勁暈（唔係見到佢暈陀陀果隻暈），又勁嘔又十幾次（唔係見到佢作嘔果隻嘔），嘔到屋企啲膠袋都冇晒，最後要出動垃圾袋。最衰係膠袋徵費計劃搞到冇晒超市膠袋拎，唔係可以嘔多幾次。
因為尋晚未食飯就又暈又嘔，所以都冇乜嘢嘔到出黎，得啲水。到最後嘔埋黃膽水，但竟然係甜嘅，因為呢排食得糖多。
我覺得頭暈同嘔係最辛苦，仲辛苦過頭痛，因為頭痛有得食必理痛但頭暈又冇必理暈，好慘。好在我老公話唔想生仔（唔關我事，我唔抗拒生），等我嘔少啲。
暈左幾個鐘，九點幾先好啲，差啲叫白車。冇叫白車係因為驚唔知係咪餓得滯頭暈。但係餓得滯頭暈應該唔會嘔掛？如果唔係咪：
餓－＞暈－＞食嘢－＞嘔－＞更餓－＞更暈－＞更嘔－＞（無限loop）
因為作嘔所以最後剩係食左一啖飯，但又唔覺得好餓，照瞓。
瞓著後發夢上咗深圳。首先係發夢搭果班火車唔知做乜壞左，回應番現實中港鐵成日故障嘅新聞。因為壞左反而可以搭一班舒服嘅特快列車，但係都係冇位坐，得企位。返到深圳，我阿媽上面買左樓，喺度執緊嘢。佢屋企樓下有個商場，有間Precious慕文，阿媽見我之前喺間嘢買左唔少卡仔果啲，叫我落去買個生果籃，儲夠分申請做會員。於是我落咗去睇，基於我本身其實好唔鍾意Precious慕文啲嘢，所以睇唔啱，個生果籃放咗喺收銀處，我哄埋去睇幾錢，睇極都睇唔到，反而見到幾個中學舊同學，我即刻匿埋，因為我當時身穿中學校服，覺得好樣衰。
大致上係咁。跟住起身做埋尋日頭暈做唔晒嘅JOB，個頭都係有少少少少暈。今次我要特別鳴謝我老公，因為我個人一病就變身drama queen，啲反應誇到爆，成晚喺到大叫話自己就死，又會詐喊咁，好煩。以前未嫁時我阿媽見得多，而家輪到老公，真係慘。 10/27/2009 宮心計
第六集咋，雖然個結尾係大團圓，出晒大合照咁，但係未完架，有排捱呀。 唔好睇嘅呢套嘢，好明顯係「參考」《大長今》呢樣野就人盡皆知，但與此同時參考埋粵語長片真係估佢唔到。尋日果集講米雪同關菊比麗麗陷害，最後竟然出動到怡楊同阿蛇加埋老穎扮鬼去嚇到麗麗鬼拍後尾枕講晒個真相出黎。一個唔覺意以為道布簾一跌低坐喺後面果個係包大人－－咦包大人呢招唔係狸貓換太子果單案用過一次咩？ 呢幕一定唔係參考《大長今》啦。如果呢套劇賣埠去韓國唔知會唔會比啲韓國人笑，又以為睇緊《皆大歡喜》囉。係啦中間果個望落都有啲似家燕姐。 真係咁多年都冇乜點進步，無線啲嘢。 10/24/2009 搵食艱難 星期五晚想出街食飯真艱難。因為要去奧海城續大眾會員證，所以諗住去食埋飯，點知搵極都搵唔到地方。
想話就近求其去札幌拉麵食啦，又見有幾張空枱咁。本身間嘢冇人帶位，我正想入去自己坐，就有個侍應走埋黎好似想帶位咁。跟住佢去，佢竟然叫我地搭枱。同枱果對情侶都有啲側目，我明明仲見到有空枱竟然要搭枱，即刻轉身走唔使講嘢。
跟住沿路見到幾間都排隊排到出尖沙咀，於是去我地之前住大角咀嘅食堂風月強，點知都要等九張枱，又係即刻轉身走唔使講嘢。
菜生見最近麥狗買一送一，想話去食，我又唔想。提議去垃圾雞食啦，多位都暈，於是坐低食。
講完。
頭先菜生話我知原來老爺奶奶都有睇我個ＢＬＯＧ！以後要小心啲唔好寫衰佢地個仔。 10/18/2009 @NJ總結加照片
新屋
食物 龍蝦屋
行街
教會
中央公園 物質 @NJ-8 又係時候離開米國喇。
星期五一早，老爺奶奶就出咗去開工。我都好早醒，不過都係等老爺奶奶出去後先起身。同菜生一齊，繼續食粥，食埋前幾日同奶奶慶祝生日嘅蛋糕，我仲食左最後一雪糕，解決咗早餐。
十點幾老爺奶奶就返到屋企，大家HEA咗一陣，影左幾張全家福，就出發去機場。菜生渣車，沿途都冇乜特別，好順利。
去到機場，第一次CHECK IN唔使排隊，以為好少人好順暢啦，檢查行李果陣先大鑊，打幾層蛇餅。跟住比個唔知海關定乜老點去咗另一邊，話果邊好少人，點知一樣打蛇餅。有個黑妹喺度埋怨話本來喺另一邊已經差唔多到佢，點知比職員老點咗黎呢邊，仲要排耐咗。排到差唔多到我地喇，另一條隊個櫃台嘅職員竟然叫佢果條隊啲人龍走去我地個櫃台搞手續，痴痴地線。我後面幾個年輕洋妞即刻投訴，話佢做乜叫啲人排我地果邊，又催前面條懵炳move move move（因為佢由得隔離條隊啲人插過黎，又唔出聲又唔搶先走上櫃台，戇居居咁），最後都總算順利過關。雖然有少少波折，不過今次唔使比人大搜身，都算好好好好。
過完關時間尚早，就去咗食嘢。我叫咗意大利粉，雖然喺美國食意大利嘢都係傻傻地，但都及不上菜生最後一餐都要食中菜，啲西蘭花仲要黃嘅。差唔多時間登機，我地就去登機閘口啦，等咗一陣就登機喇，咁聽到空姐叫我地個行數就走埋去排隊啦，點知條隊唔郁喎，一大咋俄羅斯佬喺前面，狀似排隊但又紋風不動咁。咁我地見勢色唔對，於是就走上前啦，點知班友根本唔係我地班機嘅，唔知塞住我地個登機閘口把托。
上左機，今次有人坐我地隔籬喇。而且後面仲坐咗一家三口，一個洋妞阿媽帶住個八九歲靚仔同一兩歲靚妹，原本佢地唔係坐我地後面，但個阿媽話想照顧自己啲仔女，就同人調咗位，全家坐晒喺我地後面。本身以為洋人細路女見識廣啲，冇咁易喊，點知呢個靚妹真係改變晒我對洋細路嘅印象，全程十六個鐘，起碼有十個鐘喺度大喊或者大叫。不過我最近脾氣好咗，又冇乜感覺，因為坐成十五個幾鐘機，講真我自己都想大喊同大叫啦！要怪只怪個老母做乜鬼帶個咁細嘅靚妹坐長途機，希望各位已為人母或快將為人母嘅朋友引以為戒，去長途旅行果陣交個Ｂ去ＢＢ酒店或者ＳＰＣＢ暫託一陣最好。
另外仲有一個問題，咁大陸航空啲機呢，個個椅背都有個電視仔，其實係幾好，但係因為個電視係觸控式螢幕嘅，但個螢幕又幾遲鈍下，咁有啲人（例如我身後的細路，同埋我去美國果程後面個女人）就會超級大力咁篤落去，甚至不耐煩地每秒狂按幾十下，真係背脊都比佢篤穿。遇到呢啲情形我會好大力咁向後挨一下，以示不滿，都幾有效。
十五個零鐘返到香港，當然比美國濕夾熱啦。聽到機長報告話氣溫三十度，真係嚇鬼死，不過出到去又冇想像中咁熱，路上仲有啲風添。搭車返屋企時我眼瞓到爆，本來想返到屋企即時訓覺，但結果都係打咗陣機，睇埋魯魯修同鋼煉，寫埋ＢＬＯＧ先瞓。
至此成個０９ＮＪ之旅又圓滿結束。 10/16/2009 @NJ-7 終於黎到旅程最後一天，今日了埋啲未了心願。
今日都好晏起身，九點幾，等老爺奶奶出咗門就到我地，先去Costco，買咗啲調味料同即食意大利飯。然後去Target，買咗兩本書，仲有一支芥辣。跟住行咗陣（一兩分鐘）GAP，冇嘢睇。行完就會合老爺奶奶去DINER食飯，食咗牛扒。
食完飯去附近間BATH AND BODY WORK睇HANDCREAM，鬼咁貴，冇買，買咗啲嘢送比奶奶，自己又買咗幾舊香薰蠟燭，自用。因為買夠唔知幾多錢，送件嘢，揀咗青瓜味HAND CREAM。買完嘢返歸，休息，我打咗陣機。老爺奶奶冇幾耐返黎，比咗好多LOTION我，慳番唔使買。跟住佢地睇碟，菜生玩電腦我睇書。睇完碟奶奶煮飯，好好餸。食飯前老爺拎返啲陳年舊相比我地睇，睇到大頭怪菜，仲有各人嘅後生相。食完飯菜生將呢幾日影嘅相過落老爺部電腦度，又睇咗陣相。而家我好眼瞓，應該就瞓。
今日好大雨，落足成日，好在都係喺屋企附近玩，冇乜影響。當然唔落就更好啦。 |
|
|
